Цөмийн энергийн газрын цацрагийн хяналтын лабораториос дотоодын цемент болон импортын цементэд цацраг идэвхийн шинжилгээ хийхэд импортын цементийн цацраг идэвхийн хэмжээ дотоодын цементийнхээс хоёр дахин өндөр гарчээ.

Цементийн импортын татвар 20 хувь байсныг өнгөрсөн тавдугаар сард таван хувь болгож бууруулсан. Үүний шалтгааныг манай улсын цементийн үйлдвэрүүд түүхий эдийн болон түлшний нөөцөө хангалтгүй бүрдүүлсэн тул энэ оны бүтээн байгуулалтын ажилд шаардагдах цементийн хомсдол үүсэх нөхцөл бүрдсэн байсан гэж тайлбарлаж байв.

Ид бүтээн байгуулалтын үед Засгийн газар импортын цементийн татварыг бууруулснаар ямар ч хараа хяналтгүй гарал үүслийн гэрчилгээ, лабораторийн шинжилгээний бичиг, чанарын баталгаагүй цемент маш ихээр нийлүүлэгдсэн. Тодруулбал, өнгөрсөн наймдугаар сард Хот байгуулалт, барилга, орон сууцжуулалтын яамнаас цементийн импортын татварыг бууруулсантай холбоотойгоор цементийн чанарт хяналт шалгалт хийж, импортын цемент гарал үүсэл чанарын гэрчилгээгүй байгааг тогтоосон. Ажлын хэсэг БНХАУ-ын импортын зургаан цементийн дээжид Хөндлөнгийн мэргэжлийн лабораториудад гурав болон 28 хоногийнх нь гулзайлтын бат бэхийн стандарт, бусад физик механик шинжилгээг хийсэн. Энэ хүрээнд нийтдээ 42.5 маркийн цемент хяналт шалгалтад орсон бөгөөд түүнээс гурван дээж нь 42.5 бах бэхээ хангаагүй гэх дүгнэлт гарчээ.

Чанар стандартын шаардлага хангадаггүй гэх мэдээллийн араас Цөмийн энергийн газрын Цацрагийн хяналтын лабораториос гаргасан туршилт судалгаагаар импортын цемент нь дотоодын үйлдвэрүүдийн цементтэй харьцуулахад цацраг идэвхт хэмжээ нь хоёр дахин өндөр гарсан байна. Уг судалгаа, шинжилгээний үр дүнд дотоодын цементийн цацраг идэвхт үзүүлэлт нь дунджаар 57 бк/кг гарсан бол импортын цемент нь 115 бк/кг гарсан нь чанар болон аюулгүй байдал, эрүүл мэнд зэрэгт хор нөлөөг дагуулахаас гадна манай дотоодын үйлдвэрүүд нь чанар стандартын цемент үйлдвэрлэж байгаа нь уг судалгаанаас харж болохоор байна.