Манай улсад эмчлэгдэх боломжгүй хүнд өвчнийг иргэд гадаадын улс оронд эмчлүүлдэг. Тодруулбал, манай улсад эмчлэгддэггүй 26 нэр төрлийн өвчин байдаг бөгөөд эдгээр өвчнийг гадаад улсад эмчлүүлэгсдэд Эрүүл мэндийг дэмжих сангаас нийт эмчилгээний зардлын тодорхой хувийг буцаан олгодог.

Тодруулбал 2024 оны төсөвт гадаадад эмчлүүлэгчдийн эмчилгээнд 10 тэрбум төгрөгийг төсөвлөсөн. Засгийн газрын тусгай сангийн тухай хуульд өөрчлөлт оруулж, гадаад улс оронд эмчлүүлж байгаа иргэдэд олгодог эмчилгээний зардлыг нэмэгдүүлж, хүүхдийн эмчилгээний зардлын 50, том хүнд 20 хувийг эргүүлэн олгодог болсон. Тэгвэл энэ жилийн 10 тэрбумын төсвөөс зургаан тэрбумыг нь иргэдэд буцаан олгожээ. Харин эдгээр иргэдийн мэдээллийг нууцалж байгаа аж. УИХ-ын зарим гишүүн бүрэн эрхийнхээ хүрээнд Эрүүл мэндийн яам руу албан тоот явуулаад ч энэ талаарх мэдээллийг өгөх боломжгүй гэсэн хариу өгчээ. Тиймээс энэ мөнгийг ямар хүмүүс авсан нь хардлага төрүүлж байгаа аж. Учир нь жирийн иргэд эмчилгээний зардлынхаа тодорхой хувийг төрөөс буцаан авах боломжтойг тэр бүр мэддэггүй. Тиймээс мэдээлэлд ойр, албан тушаалтнуудын хамаарал бүхий этгээд мөн л төрийн энэ дэмжлэгийг авсан байх магадлалтай тадаар эх сурвалж мэдээлсэн юм.

Дашрамд дурдахад, гадаад улсад өвчнөө эмчлүүлэх өргөдөл гаргаж байгаа иргэдийн ихэнх нь мэдрэл, хавдар, эрхтэн шилжүүлэн суулгах гэсэн оношоор дэмжлэг хүсдэг байна. Түүнчлэн нийт өргөдлийн 42 хувь нь хүүхдийн өвчлөлтэй холбоотой байдаг юм байна. Жил бүр гадаадад эмчлүүлэх хүсэлтэй 250-300 иргэн өргөдлөө салбар хариуцсан яаманд өгдөг аж.