Засгийн газрын хуралдаанаар хэлэлцэн шийдвэрлэсэн асуудлаар Засгийн газрын Хэрэг эрхлэх газрын дарга Н.Учрал мэдээлэл хийлээ. Засгийн газрын хуралдаанаар ЭТТ ХК-ийн удирдлагыг олон улсын менежментээр удирдуулах тухай тогтоолыг баталж, мөн хувийн хэвшилд байгаа стратегийн ордын эзэмшигч нарт хэлэлцээр хийх урилга хүргүүлэх болсон байна.

ЗГХЭГ-ын дарга Н.Учрал: Өнөөдрийн Засгийн газрын хуралдаанаар Эрдэнэс Тавантолгой хувьцаат компанид авах арга хэмжээний тухай тогтоолыг баталлаа.ЭТТ ХК-ийн 28 хувийг иргэд эзэмшдэг. Тодруулбал, 3.4 сая хувьцаа эзэмшигчтэй компани гэсэн үг. Хэдийгээр бирж дээр хувьцаа нь арилжаалагдаагүй ч гэсэн энэ бол ил тод нээлттэй компани. Өнөөдөр ЭТТ ХК-ийн удирдлагыг олон улсын менежментээр удирдуулах Засгийн газрын шийдвэр гарлаа гэж ойлгож болно.

Гаднын менежментээр удирдуулдаг хамгийн сайн жишээ нь Чили улсын Codelco буюу төрийн өмчийн зэс үйлдвэрлэлээрээ дэлхийд тэргүүлж байгаа компани. Манайх шиг хүдэр дэх зэсийн агуулга нь буурсан. Үйлдвэрлэлийн өртөг нь өссөн. Мөн улс төрийн нөлөөлөл орсон. Ил тод нээлттэй байдал алдагдсанаас болоод менежментийн үйл ажиллагаа доголдсон байсан. Чилийн Codelco компани зөвлөх үйлчилгээний компани аваад, менежментээ хөндлөнгийн компаниар удирдуулсан. Үүний үр дүнд орлого өссөн сайн үзүүлэлтүүд гарсан сайн туршлага байдаг. Мөн Саудын Арабын хаант улсын Аж үйлдвэр эрдэс баялгийн харьяа Mining компани хөндлөнгийн менежментийн компаниар удирдуулсан. Үүний үр дүнд мөн үйлдвэрийн хүчин чадал нэмэгдсэн. Зардал 20 хувь буурч, орлого нэмэгдсэн сайн үзүүлэлтүүд байдаг. Мөн Хятадын төрийн өмчийн компанид ч ийм туршлага бий. Тийм ч учраас ЭТТ ХК-ийн менежментийг авч явах олон улсад нээлттэй сонгон шалгаруулалтыг зарлаад, дэлхийн хэмжээнд хүлээн зөвшөөрөгдсөн менежментийн компаниар удирдуулах Засгийн газрын шийдвэр гарч байгаа. Бид өнөөдрөөс эхлээд ЭТТ ХК-д аудит, үнэлгээ хийнэ. Ажлын албан даалгавар боловсруулах дээр зөвлөх үйлчилгээ авна. Нээлттэй сонгон шалгаруулалт явуулах тал дээр мөн зөвлөх үйлчилгээ авна.