Боловсролын сайд П.Наранбаярын явуулж буй бодлого, шийдвэртэй холбоотой эсэргүүцэл, огцруулах шаардлага, хүсэлтүүд ар араасаа хөвөрч байна. Салбарын байгууллагууд нь түүний гаргаж буй шийдвэрт "цаг үеийн мэдрэмжгүй, боловсроогүй, сайд байх эрхгүй" хэмээн ихээхэн шүүмжлэлтэй хандаж, салбарын асуудлууддаа бодитой, ул суурьтай хандахыг сануулж байгаа юм. Тухайлбал, 2024 оны есдүгээр сарын 20-нд Монголын багш нарын үйлдвэрчний эвлэлийн холбооноос Ерөнхий сайд Л.Оюун-Эрдэнэд "Боловсролын сайд П.Наранбаярт хариуцлага тооцон огцруулах, салбарын багш, ажилтны цалин хөлсийг нэмэгдүүлэх" талаар шаардлага хүргүүлэхээр болсноо мэдээлсэн.

МБҮЭХ: Боловсролын сайдыг огцруулахгүй бол өндөг байтугай чулуу нүүлгэнэ, ажил хаяна

Монголын багш нарын үйлдвэрчний эвлэлийн дарга Д.Мөнхбаатар: П.Наранбаяр нь одоо мөрдөгдөж байгаа болон тухайн үед мөрдөгдөж байгаа хууль дүрмээр багшлах эрхгүй байсан. Сайд болсноосоо хойш салбарын асуудлуудыг нэлээд бужигнуулж байна. Боловсролын яаман дээр нийслэлийн сургуулиудын захирлуудыг цуглуулж уулзалт хийх нэрийн доор Нийслэлийн ИТХ-д нэр дэвшиж байгаа Хүн намын нэр дэвшигчдийг дэмжихийг уриалж, төрийн яамыг сонгуулийн сурталчилгаа болгосон. Багш нарын цалингийн асуудлын талаар маш бодлогогүй үгнүүдийг хэлсэн. Тухайлбал, Монголын багш нар 1000 долларын цалин авдаг мэтээр худлаа ярьж, болчимгүй үйлдлүүдийг хийж байна. Саяхан сайдын тушаалаар курсийн багшийг бэлтгэх шийдвэрийг гаргаж, нийгмийг талцууллаа. Сайд болсноосоо хойш маш олон хууль бус үйлдлүүд хийсэн..Боловсролын салбарын гол ачаалал нийслэлд байна гэж үзэж байгаа. Гэтэл нийслэлийн багш нарт ямар ч нэмэгдэл байхгүй. Энэ асуудлыг шийдэж өгөөч ээ. Геометрийн прогрессоор өсөж байгаа багшийн хомсдолыг архиметикийн прогрессоор өсөх цалин хэзээ ч гүйцэхгүй. Нэг ангид 30-аас дээш хүүхэд сургамааргүй байна. Бродюр солихдоо стандарт бариад байдаг. Боловсролын байгууллага руу орохдоо стандарт барьдаггүй байж болохгүй. Болчимгүй үг, үйлдэл гаргаад байгаа. Багш нарыг нийгэмд гутааж, доромжлоод байгаа, мэргэжлийн биш увайгүй хүн намын сайдаа зайлуул аа. Хатуу хэлж байна.

Тэгвэл өнөөдөр Монголын шинжлэх ухааны байгууллагуудын Үйлдвэрчний эвлэлийн нэгдсэн хорооноос Боловсролын сайд П.Наранбаярт шаардлага хүргүүлж, шинжлэх ухааны салбарт хариуцлагата хандахыг санууллаа.

МШУБҮЭНХ: Монгол Улсыг сэтгэх тархигүй болгох гэж байна уу. Монгол Улсад шинжлэх ухаан хэрэггүй юм уу

Монголын шинжлэх ухааны байгууллагуудын Үйлдвэрчний эвлэлийн нэгдсэн хорооны дарга Т.Баясгалан: Учир мэдэхгүй сайд нар шинжлэх ухааны хүрээлэнгүүдээр гараа угаах гээд байна. Монгол Улсыг сэтгэх тархигүй болгох гэж байна уу гэж үнэхээр харддаг боллоо. Монгол Улсад шинжлэх ухаан хэрэггүй юм уу. Иймд Боловсролын сайд П.Наранбаяр дараах гурван зүйлээр шаардлага хүргүүлж байна.

Нэгд, хүрээлэнгүүдийн харьяалал санхүүжилтийн асуудалд ул суурьтай хандаж, Монгол Улсын шинжлэх ухаан,технологийн нэгдсэн бодлого, удирдлага, санхүүжилтийн нэгдмэл байдлыг бэхжүүлэхэд анхаарах,

Хоёрт, их сургуулиудын хүрээлэнгүүдийн харьяаллын асуудлаар хүрээлэнгүүдийн ажилтнуудаас санал авч, хүрээлэн тус бүрийн онцлог, нөхцөл байдлыг харгалзаж, асуудлыг нарийвчлалтай шийдвэрлэх талаар идэвх санаачилгатай ажиллах,

Гуравт, Мал, аж ахуйн эрдэм шинжилгээний хүрээлэн, Мал эмнэлгийн хүрээлэн, Ургамал, газар тариалангийн эрдэм шинжилгээний хүрээлэн, Ургамал хамгааллын эрдэм шинжилгээний хүрээлэн, Анагаах ухааны хүрээлэнгийн 2025 оны төсвийг Эдийн засаг хөгжлийн сайдын багцад тусгуулахыг шаардаж байна гэсэн шаардлагыг хүргүүлж байна. Энэ шаардлагын хариуг есдүгээр сарын 28-ны дотор хариу өгөхгүй, шаардлагатай арга хэмжээг авахгүй бол дараагийн тэмцлийн арга хэмжээнд орно.  Тухайлбал, аравдугаар сарын 1-нээс жагсаал хийж, суулт зарлахаар төлөвлөж байна. Монголын боловсрол, шинжлэх ухааны үйлдвэрчний эвлэлийн холбоо хамтарч ажиллаж байна. Сайд гэдэг албан тушаалд бэлтгэгдсэн хүн очдог болохоос биш очоод бэлтгэгддэг албан тушаал биш. Улс орныг ингэж самарч болохгүй. Долоо хэмжээд нэг огтолдог байтал нэг хэмжээд долоо огтолж байна.