Японы Ерөнхий сайд Фүмио Кишида, Монгол Улсын Ерөнхийлөгч У.Хүрэлсүх нар өнгөрсөн ням гарагт хоёр улс батлан хамгаалахын техник, технологи дамжуулах хоёр талын гэрээ байгуулах хэлэлцээрийн тохиролцоонд хүрлээ гэж Японы Japantimes мэдээллээ. Хоёр удирдагчид Нью-Йорк хотноо 40 орчим минут уулзсан байна. Хоёр улсын удирдагчдын тохирсон гэрээ нь хоёр улс батлан хамгаалахын техник, технологийг харилцан экспортлох, шилжүүлсний дараа тэдгээрийн менежментийг хангах зорилготой юм.
Энэхүү гэрээнд гарын үсэг зурсны дараа Японы Засгийн газар Монгол Улс руу экспортлох бараа бүтээгдэхүүний талаар хэлэлцээгээ эрчимжүүлэхээр төлөвлөж байна. Мөн Кишида, У.Хүрэлсүх нар Хойд Солонгост үзүүлэх хариу арга хэмжээний талаар ярилцсон байна.
Япон, Монгол хоёр улс цаашид нягт хамтран ажиллах, тэр дундаа НҮБ-ын Аюулгүйн зөвлөлийн тус улсын талаарх тогтоолуудыг бүрэн хэрэгжүүлэхийг Хойд Солонгост уриалах болно гэв. Хэдэн арван жилийн өмнө БНАСАУ Япон иргэдийг хулгайлсан асуудлаар Монголын тал хамтран ажилласанд У.Хүрэлсүхэд Кишида талархал илэрхийлжээ.
Ерөнхий сайд өнгөрсөн сард Монголд айлчлах байсан ч Японд газар хөдлөлт болсны улмаас цуцлагдсан. Ням гарагт Нью-Йорк хотноо Кишида Канадын Ерөнхий сайд Жастин Трюдотой уулзсан бөгөөд тус улс 2025 онд хөгжингүй долоон орныг даргалах гэж байна. Кишида Трюдод Канад Их долоогийн хүчирхэг хамтын ажиллагааг удирдана гэж найдаж байгаагаа хэлэв. Их долоод Их Британи, Канад, Франц, Герман, Итали, Япон, АНУ, мөн Европын холбоо багтдаг. Кишида мөн НҮБ-ын Ерөнхий нарийн бичгийн дарга Антонио Гутерриш, Европын зөвлөлийн дарга Чарльз Мишель нартай уулзав.
