Монголын багш нарын үйлдвэрчний эвлэлийн холбооноос Ерөнхий сайд Л.Оюун-Эрдэнэд "Боловсролын сайд П.Наранбаярт хариуцлага тооцон огцруулах, салбарын багш, ажилтны цалин хөлсийг нэмэгдүүлэх" талаар шаардлага хүргүүлэхээр болсноо мэдээллээ. Түүнчлэн, шаардлагыг хүлээн авахгүй бол суулт, жагсаалт зарлана гэдэг мэдэгдэв.

Монголын багш нарын үйлдвэрчний эвлэлийн дарга Д.Мөнхбаатар “П.Наранбаяр нь одоо мөрдөгдөж байгаа болон тухайн үед мөрдөгдөж байгаа хууль дүрмээр багшлах эрхгүй байсан. Сайд болсноосоо хойш салбарын асуудлуудыг нэлээд бужигнуулж байна. Жишээлбэл, хичээлийн шинэ жилийг дөрвөн улирал байсныг гурав болгосон.

Багш нар болон эцэг эхчүүдийг залхаасан арга хэмжээнүүдийг зохион байгуулахаар болоод хичээлийн шинэ жил эхэлсэн. Мөн багш нарын цалингийн асуудлын талаар маш бодлогогүй үгнүүдийг хэлсэн. Тухайлбал, Монголын багш нар 1000 долларын цалин авдаг мэтээр худлаа ярьж, болчимгүй үйлдлүүдийг хийж байна. Саяхан сайдын тушаалаар курсийн багшийг бэлтгэх шийдвэрийг гаргаж, нийгмийг талцууллаа. Сайд болсноосоо хойш маш олон хууль бус үйлдлүүд хийсэн. Жишээлбэл, есдүгээр сарын 1-нд буюу амралтын өдөр хичээлийн шинэ жилийн нээлтийг хийлгэсэн. Үүнээс улбаалаад багш нарын амралтын өдөр ажиллавал Хөдөлмөрийн хуульд заасанд нөхөж амрах эсвэл илүү цагийн мөнгийг олгох энэ зохицуулалтыг хийхгүй явж байгаа.