Швейцар дахь Дэлхийн өрсөлдөх чадварын төв болон Эдийн засгийн бодлого, өрсөлдөх чадварын судалгааны төвийн зүгээс “Дэлхийн авьяас, ур чадварын тайлан 2024”-ыг танилцууллаа. Уг тайланд дэлхий 67 орныг хамруулсан бөгөөд Монгол Улс авьяас, ур чадварын үзүүлэлтээр сүүлж мушгижээ.
Дэлхийн авьяас, ур чадварын тайлан нь улс орнуудыг үнэлэхдээ үндсэн гурван бүлгийн мэдээллийг ашигладаг байна. Үүнд:
Хөрөнгө оруулалт, хөгжлийн хүчин зүйл (Investment and Development): Авьяас, ур чадварыг төлөвшүүлэхэд чиглэсэн дотоодын нөөц бололцоо
Авьяас, ур чадварыг татах хүчин зүйл (Appeal): Олон улсын болон дотоодын зах зээлээс авьяас чадварыг татах, хадгалах чадвар
Бэлэн байдлын хүчин зүйл (Readiness): Мэргэжилтэн, ажиллах хүчийг ажиллуулах нээлттэй, бэлэн байдал
Эдгээр үндсэн гурван бүлэг нь боловсролын систем, ажлын байран дахь сургалт, ажилчдын хөгжил дэвшил, гадаад хэлний ур чадвар, амьжиргааны өртөг, амьдралын чанар, боловсролын салбарт оруулж буй хөрөнгө оруулалт зэрэг 31 шалгуур үзүүлэлтийг агуулдаг.
2024 оны судалгаанаас харахад авьяас, ур чадварын эрэмбээр Швейцар улс тэргүүлсэн хэвээр байгаа бол, Сингапур өнгөрсөн жилээс зургаан байр урагшилж 2-рт, Люксембург 1 эрэмбээр ухарч 3-рт, Швед мөн 6 байр дээшилж 4-т, Дани 5-д, Исланд 6-д Норвег 7-д эрэмбэлэгдлээ. Үүнээс гадна Австрали дөрвөн байр ахиж 14-т, АНУ 6 байраар ухарч 21-т, БНХАУ гурван байр ахиж 38-д, Япон 43-рт эрэмбэлэгджээ. Авьяас, ур чадвар хамгийн сул орнуудаар Венесуэл (65-рт), Бразил (66-рт), Монгол (67-рт) тус тус эрэмбэлэгдэж сүүл мушгижээ.
Монгол Улс ерөнхий үнэлгээ 26.47 оноотойгоор 67 улсаас 67-д эрэмбэлэгдэж сүүл мушгисан. Энэ нь өнгөрсөн оноос 3.29 оноогоор нэмэгдсэн ч гурван эрэмбэ ухарсан үзүүлэлт юм. Хөрөнгө оруулалт, хөгжлийн хүчин зүйлээр 61-т, авьяас, ур чадварыг татах хүчин зүйлээр 67-д буюу өнгөрсөн жилээс гурван байр ухарсан, мэргэжилтэн, ажиллах хүчийг ажиллуулах нээлттэй, бэлэн байдлаар 65-д эрэмбэлэгдсэн нь өнгөрсөн жилээс 2 байраар ухарсан үзүүлэлт юм.
Авьяас, ур чадварын ерөнхий эрэмбэ буурахад амьдралын чанар 66-д, санхүүгийн ур чадвар 64-т, менежерүүдийн ур чадвар, олон улсын туршлага 66-д, их сургуулийн боловсрол 64-т гэх мэт үзүүлэлтүүд хойгуур эрэмбэлэгдсэн нь нөлөөлжээ.
Эх сурвалж: Эдийн засгийн бодлого, өрсөлдөх чадварын судалгааны төв
