Далайд гарцгүй Монгол Улс нь Оросын байгалийн хийг Хятадад нийлүүлэх гол транзит зам бөгөөд "Сибирийн хүч 2" дамжуулах хоолойн бараг 1000 километрийг тус улсын газар нутаг дээгүүр тавина. Жилд 50 тэрбум шоо метр хий үйлдвэрлэх хүчин чадалтай уг төсөл нь Украиныг эзлэн түрэмгийлсний дараа Орос 2022 онд Европ руу дамжуулах хоолойн хийн экспортоо зогсоосны дараа алдагдсан хэмжээг нөхөхөд туслах зорилготой юм.
ОХУ-ын төрийн хяналтад байдаг байгалийн хийн аварга компани Газпром болон Оросын Засгийн газар "Сибирийн хүч 2"-ын маршрут болон байгалийн хийн нийлүүлэлтийн нөхцөлийн талаар Хятад, Монгол хоёр улстай яриа хэлэлцээ ахицтай байгаа талаар удаа дараа мэдээлж байсан. Монголын УИХ Засгийн газраас өргөн мэдүүлсэн таван жилийн хөгжлийн төлөвлөгөөг эцэслэн батлахдаа "Сибирийн хүч 2" хийн хоолойг оруулаагүй байна.
Тус улс эрчим хүчний хомсдолыг арилгахын тулд нүүрс, усан цахилгаан станц, сэргээгдэх эрчим хүчний эх үүсвэрт найдах шаардлагатай болно гэсэн үг юм. Бүтээн байгуулалтын төлөвлөгөөнд тусгагдсаны дагуу 2028 оноос өмнө нийт 400 мегаваттын хүчин чадалтай хоёр усан цахилгаан станц, 450 мВт-ын нэг нүүрсээр ажилладаг цахилгаан станц барьж, улс орон болон нийслэл Улаанбаатар хотын эрчим хүчний хэрэгцээг хангахаар төлөвлөжээ.
Төлөвлөж буй шинэ цахилгаан станцуудаас гадна Монгол Улсын эрчим хүчний бодлогод салхи, нарны эрчим хүчний эх үүсвэрт анхаарлаа хандуулах болно гэж төлөвлөгөөнд дурджээ.
Оросын ГХЯ-ны хэвлэлийн төлөөлөгч Мария Захарова "Монголын түншүүд эхэндээ Оросын байгалийн хийн дамжин өнгөрүүлэх орон байхаар төлөвлөж хүсэж байсан бол одоо эдийн засаг, аж үйлдвэр, дэд бүтцээ хөгжүүлэхийн тулд хий ашиглах боломжийг судалж байна" хэмээсэн талаар Москвад төвтэй Интерфакс агентлаг мэдээлжээ.
Тэрбээр "“Сибирийн хүч 2" төсөл бэлэн байгаа бөгөөд Хятадтай үнийн нөхцөл, нийлүүлэлтийн хэмжээг тохиролцсоны дараа дамжуулах хоолой барих ажлыг эхлүүлэх боломжтой. "Газпром" болон Хятадын үндэсний газрын тосны корпорацын хооронд холбогдох хэлэлцээр хийгдэж байна" гэжээ.
Оросын газрын тос, байгалийн хийн тэргүүлэх шинжээч Михаил Крутихин хэлэхдээ, Москвагийн өөдрөг мэдэгдлийг үл харгалзан "Газпром" саяхан Сибирийн хүч 2 хийн хоолойноос зайлсхийж, илүү их хий нийлүүлэхийн тулд Зүүн Сибирьт нэн яаралтай хайгуул хийж эхэлсэн хэмээжээ. Тус компанийн Зүүн Сибирь дэх Чаянда болон Ковыкта дахь байгалийн хийн хоёр ордын нөөцийг дахин үнэлсний дараа уг ордын нөөцийг жилдээ 38 тэрбум шоо дөрвөлжин метрээр нийлүүлсээр байвал урт хугацаанд нийлүүлэхэд хүрэлцэхгүй байж болзошгүй гэж үзсэн.
