“Парис-2024” зуны паралимпын наадмын таеквондогийн эрэгтэйчүүдийн 63 кг-ийн жингийн K44 ангилалд МУГТ Г.Болор-Эрдэнэ мөнгөн медаль хүртсэн билээ. Бид МУГТ Г.Болор-Эрдэнийн эхнэр Б.Минжирмаатай холбогдож баярын сэтгэгдлийг нь хуваалцсан юм. Тэрээр нягтлан мэргэжилтэй бөгөөд нөхөртэйгөө хамт паралимпын наадамд очсон байна.
Паралимпын мөнгөн медальт Г.Болор-Эрдэнийн эхнэр Б.Минжирмаа: Алтын дайтай мөнгөн медаль байлаа. Хичээл зүтгэлийг нь юутай ч зүйрлэж, яаж илэрхийлэхээ мэдэхгүй байна. Зүйрлэшгүй хөдөлмөр, хөлс, хүч, өөрт байгаа бүх зүйлээ зориулан хичээллэж, үр шимийг нь хүртэж яваа агуу тамирчин. Аав, ээжийн сайн хүү, алаг нүдэн гүнжийн аав шүү дээ. Олимпын мөнгөн медаль хүртсэнд нь их маш баяртай байна. Нөхрийнхөө дэвжээн дээр гарахыг нь харахад маш гайхамшигтай санагддаг. Тэмцээн болгоных нь өмнө түрүүлж ам гарахгүй, сэтгэл хөдлөлөө маш их барьж үздэг. Олимпын дэвжээнд гарахад нь бол өөрийн мэддэг маань мэгзмээ уншин залбирч, хамаг чадлаараа монгол урагшаа, чадна гэж охиныхоо жижигхэн оймсыг гартаа тас атган дэмжсэн. Амьсгаа даран үзлээ.
Миний хувьд нөхөр минь олимпоос алт авсан домогт тамирчин. Үүнтэй хэн ч маргахгүй байх. Монголын ард түмэн минь ч өндөлзөн өндөлзөн үзэж, алтан медалийн дайтай мөнгө авсан гэж адилхан бодож байгаа байх аа.
Тамирчин хүний эхнэр байх нь нэр хүндтэй үүрэг. Нөхөр бид хоёр одоогийн залуусын л адил цахим сүлжээгээр танилцаж байсан. Тухайн үед би фейсбүүкээр хэсэг сенсаац болсон монгол дээлтэй моринд хайртай охин байлаа. Манай нөхөр бас моринд маш их дуртай болохоор тэр үед фейсбүүкээр миний зургийг хараад эхнэрээ болгоно гэж найзууддаа ам гарч байсан гэсэн. Тэгээд л одоо эхнэр нь болсон байна даа. Нөхөр минь хүн болгонтой дандаа бөхийн мэндэлж, хүндэлж маш сайхан харьцдаг. Бас намайг тултал хайрлаж, хамгаалдаг. Нөхрийнхөө эдгээр зан чанаруудаар маш их бахархдаг.
Нөхөр минь өдрийн хоёр, гурван хүнд хүчний бэлтгэлтэй байдаг. Тэвчээр хатуужлын туйл хүн шүү дээ. Сүүлийн жил гаруй олимпын оноо цуглуулах тэмцээнүүдэд бүгдэд нь маш амжилттай оролцсон. Тэр 10 гаруй удаа финалд шалгарсан. Миний хувьд түүний амжилт болгоныг нь чимээгүйхэн харж, олимпоо хүлээсэн. Тамирчны алдар хямдхан олддоггүй. 2020 оны олимпын дараа хамгийн том уналтад орж байсан. Гэхдээ хамтдаа бүгдийг даван туулаад гарсан. Энэ олимпоос хүлээлт ихтэй байлаа. Хүн болгон одоо л олимпын медаль гэж байсан болохоор би бас хайрдаа дарамт болчих вий гээд чимээгүй л байсан. Гэхдээ энэ удаа ямартай ч медальтай байх гэж дотроо бодож байлаа. Тэгээд нөхрөө над руу харвал инээгээд, үнсээд л тэр мөчүүдийг давсан. Миний хувьд нөхөр минь олимпоос алт авсан домогт тамирчин. Үүнтэй хэн ч маргахгүй байх. Монголын ард түмэн минь ч өндөлзөн өндөлзөн үзэж, алтан медалийн дайтай мөнгө авсан гэж адилхан бодож байгаа байхаа гэлээ.
Г.Болор-Эрдэнэ нь таеквондогийн дэлхийн таван удаагийн аварга, Ази тивийн таван удаагийн алтан медальтай тамирчин. Мөн Ханжоу 2022" Азийн зуны спортын пара наадамд түрүүлж, Азийн пара наадмаас алтан медаль хүртсэн анхны монгол таэквондоч болсон билээ. Түүнчлэн, паралимпын анхны мөнгөн медальтай тамирчин болж, түүхэнд нэрээ мөнхөллөө.
