УИХ-ын ээлжит бус чуулганаар Монгол Улсын 2024 оны төсвийн тухай хуульд өөрчлөлт оруулах тухай, Үндэсний баялгийн сангийн 2024 оны төсвийн тухай хуулийн төслүүдийг баталлаа.
Энэхүү Төсвийн тухай хуулийн өөрчлөлт хамтарсан Засгийн газарт орсон улстөрийн намуудын гэрээнд суурилсан Засгийн газрын 2024-2028 оны үйл ажиллагааны хөтөлбөрт чиглэсэн томоохон төслүүдийг цогцоор нь шийдэх эхлэлийг тавьж байгаа юм. Өөрөөр хэлбэл, “Хурдтай хөгжлийн төлөөх зориг” хамтарсан Засгийн газрын үйл ажиллагааны хөтөлбөрт үндэслэн 2024 оны төсвийн тодотголын төслийг боловсруулсан юм.
Монгол улсын парламентын түүхэн дэх хамгийн анхны өргөтгөсөн бүтцээс эмхлэгдэн байгуулагдсан хамтарсан Засгийн газар хөгжлийн зүтгүүрийг хурдасгахын тулд "Хурдтай хөгжлийн төлөөх зориг" хэмээх ажлын гэрээг кабинет доторх улс төрийн намуудтай байгуулан ажиллаж байна.
Энэхүү гэрээний үндсэн дээр Засгийн газрын ойрын 4 жилийн мөрийн хөтөлбөрийг боловсруулж, ингэхдээ төсвийн хөрөнгө оруулалтаас шалтгаалсан хумигдмал, бизнесийн салбар дахь төрийн хэт хараат орчныг халах зоримог шийдлүүдийг тусгаад байгаа билээ. Үүний тулд дан ганц татварын орлогын эх үүсвэрийг хүлээх биш гадаад эх үүсвэртэй хөрөнгө оруулалтыг нэмэгдүүлэхээс аргагүй хөгжлийн зам дээр Монгол Улс зогсч байна. Хамтарсан Засгийн газар улс орныхоо ирээдүйн 30 жилийн хөгжлийг гурван жилд багтаах товчилсон үсрэнгүй хөгжлийн зураглалыг гаргаж ирээд байна. Гагцхүү үүнийг ажил хэрэг болгон гүйцэлдүүлэхийн тулд нэгдсэн төсвийн зарлага, төсвийн тэнцэл, Засгийн газрын өрийн тусгай шаардлагын бүтэц, агуулгыг шинэчлэх алхамтай нүүр тулж байна. Нэг үгээр хэлбэл, эдийн засгийн хөгжлийн тогтолцоонд хувьсгал хийхийг зорьж байна гэсэн үг. Үүнд эдийн засгийн өсөлтийн прогноз ч эерэг нөлөөлөх магадлал өндөр харагдаж байна. Тодруулбал, 2024 оны эхээр Монгол Улсын эдийн засаг 7.8 хувиар өсч, энэ онд уул уурхайн сэргэлт үргэлжлэх төлөвтэй байна. Улмаар уул уурхайн сэргэлтээс хамаарч эдийн засаг 5.6 хувиар өсөх таамгийг гаргаад байгаа билээ. Гэхдээ экспорт дагасан өсөлтийн таамагт хэт найдах нь өрөөсгөл. Тиймээс л Засгийн газраас эдийн засгийн багтаамжийг нэмэгдүүлэх, хөгжлийг хурдасгах багц арга хэмжээг хэрэгжүүлэхийг зорьж байна. Төмөр замаар ачаалах уул уурхайн бүтээгдэхүүний хэмжээг 10 сая тоннд хүргэх үүднээс Шивээ хүрэн-Сэхээ боомтын 6.9 км төмөр замыг энэ онд ашиглалтанд оруулах, эрчим хүчний салбарыг чөлөөлөх реформыг эхлүүлэх, бүсчилсэн хөгжил, Шинэ сэргэлтийн бодлогод тусгагдсан бүтээн байгуулалтын ажлуудыг эрчимжүүлэх багц төлөвлөгөөг батлууллаа.
Энэ онд хэрэгжүүлж эхлэх төсөл хөтөлбөрүүд:
• Солонго 1,2 орон сууц барих төсөл
• Шинэ төв цэвэрлэх байгууламж,
• Улаанбаатар хотын ногоон орон сууц
• Газрын тос боловсруулах үйлдвэр
• 10 аймгийн дулааны станц
• Улаанбаатар хотын дулаан хангамжийг сайжруулах төсөл
