УИХ-ын ээлжит бус чуулганаар улсын төсөвтэй холбоотой олон хууль, тогтоолууд хэлэлцэгдэж байгаагийн нэг нь Уул уурхайн бүтээгдэхүүний биржийн тухай хууль юм.

Төсвийн орлогын дийлэнхийг бүрдүүлдэг уул уурхайн бүтээгдэхүүний экспортод чухал нөлөө үзүүлж буй биржийн тухай хууль 2 дахь жилдээ хэрэгжиж, өнгөрсөн оноос үр өгөөжөө өгч, улсын төсөвт нүүрснээс оруулж буй орлого эрс өссөн.

УИХ-ын гишүүн Ж.Ганбаатар ээлжит бус чуулганы үеэр хуулийн хэрэгжилт сүүлийн үед суларсныг анхааруулж, шалтгаан нөхцөлийг холбогдох албаныхнаас тодруулсан юм.

Тэрээр, манай улс 2023 онд нүүрсний экспортынхоо 30 орчим хувийг биржээр арилжиж чадсан. Улмаар энэ онд 100 хувьд хүргэнэ гэдэг зорилт тавьсан байсан. Оны эхний хагаст биржээр борлуулсан нүүрсний арилжаа идэвхтэй байсан ч сүүлийн хоёр гурван сард арилжаа эрс багассан байна.

Мөн зэсийн баяжмалын арилжааг энэ оны 5 дугаар сард амжилттай эхлүүлж, 6 дугаар сард 2 дахь арилжааг явуулсан. Гэтэл үүнээс хойш зэсийн баяжмал биржээр борлуулагдаагүй байна.

Багагүй саад бэрхшээл туулж эхлүүлсэн, амжилттай үргэлжилж байсан чухал ажил зогсонги байдалд орсон байна, цаашид улам сайжруулах хэрэгтэй. УИХ-ын гишүүний хувиар энэ асуудалд анхаарч, шаардлага тавьж ажиллах болно гэсэн юм.