УИХ-ын ээлжит бус чуулганаар төсвийн тодотгол болон Засгийн газрын 2024-2028 оны үйл ажиллагааны хөтөлбөр батлах, Монгол Улсын 2024 оны төсвийн тухай хуульд өөрчлөлт оруулах тухай хэлэлцэж байгаа юм.
Тэгвэл УИХ-ын зарим гишүүн Төсвийн тухай хуулийн төслийг дагалдуулан өргөн барьсан зарим хуулийн төслийг эргүүлэн татах асуудлаар санал гаргахаар болжээ. Тодруулбал УИХ-ын гишүүн Ч.Лодойсамбуу, Б.Энхбаяр нар өнөөдөр Төсвийн байнгын хорооны хуралдаанд Тендерийн тухай хуулийн нэмэлт, өөрчлөлтийн төслийг Засгийн газарт буцаах зарчмын санал гаргах талаар цахим хуудсаараа мэдэгдлээ.
УИХ-ын гишүүн Ч.Лодойсамбуу “Төсвийн тодотголоор далдалж оруулж ирсэн тендертэй холбоотой аюулын хуулиудыг буцааж татах, дараа тусад нь оруулж ирж сайтар хэлэлцэх зарчмын саналыг Б.Энхбаяр гишүүнтэй хамтарч Төсвийн байнгын хороонд гаргахаар боллоо. Гишүүд нам харгалзахгүй дэмжиж хамтарна гэж итгэж байн. Тендерийн хуулийг буцаахгүй бол энэ парламент шинэ дээрээ 30 жилийн асар том авлига, хулгайн хөрсийг нь бэлдэж өгсөн буруутан болно" гэв.
УИХ-ын гишүүн Б.Энхбаяр “40 тэрбумын тендерийн төсөл, хөтөлбөрийг нээлттэй тендергүйгээр, УИХ-ын хяналтаас гадуур шийдвэрлэх гэсэн тендерийн хуулийн өөрчлөлтийг Засгийн газарт буцаах саналыг Ч.Лодойсамбуу гишүүнтэй хамтарч гаргахаар боллоо. тендерийн хуулийн өөрчлөлтийг төсөв дагуулж хулгайн арга замаар бус, тусдаа бие даасан байдлаар УИХ-д өргөн мэдүүлж хэлэлцүүлэх зарчмиын байр суурьтай байна” гэжээ.
