-Редакцын бус нийтлэл болно-
Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн шинэчилсэн найруулга 2023 оны 06 дугаар сард батлагдаж 2024 оны 01 дүгээр сарын 01-ний өдрөөс хүчин төгөлдөр мөрдөгдөж эхэлсэн. Гадаадын этгээдийг тендер сонгон шалгаруулалтад оруулцуулж, худалдан авах ажиллагааг бүрэн цахимжуулсан давуу талтай гэж хууль боловсруулагчид онцолж байсан нь саяхан. Харамсалтай нь, өнөө хууль нь хэрэгжиж эхэлсэн цагаасаа хойш худалдан авах ажиллагаа зохион байгуулж буй төрийн байгууллагын толгойны өвчин болоод хувирсан гэхэд үнэнээс хол зөрөхгүй.
Тухайлбал өмнөх хуульд нэг ч аж ахуйн нэгж байгууллага тендерт саналаа ирүүлээгүй тохиолдолд шууд гэрээ байгуулах зохицуулалттай байсан бол шинэчилсэн найруулгаар аж ахуйн нэгж байгууллага санал ирүүлтэл хугацааг сунгаж дахин зарлах зохицуулалтыг оруулсан. Үүнээс болж худалдан авах ажиллагаа зохион байгуулж буй төрийн байгууллагын ажил сунжирч бүтээн байгуулалтын ажлууд цар наргүй хойшилсон. Нөгөө талдаа ямар нэг байгууллагыг шалгаруулахын тулд шалгуур үзүүлэлтийг бууруулж санал хэлсэн хэн гуай ч шалгарах нөхцөлийг бүрдүүлчихсэн гэхэд болно.
Үнэлгээний хороо тендерт материал ирүүлсэн байгууллагаас хамгийн бага үнийн санал ирүүлсэн байгууллагыг шалгаруулах ёстой. Харамсалтай нь үнээ дагаад чанар муудаж байгаа нь бүтээн байгуулалтын ажлаас харагдах болсон. Бага үнийн дүнгийн арга гээд доод үнийг хэлсэн сайн дурын уран сайханчдаар ажлаа хийлгээд байх уу?
