Өнөөдөр УИХ-ын долоон байнгын хороо өнөөдөр хуралдаж, 2024 оны төсвийн төсөл, хамт өргөн мэдүүлсэн хуулийн төслүүдийг хэлэлцэж байгаа билээ. Төсөв дагалдуулан оруулж ирсэн Тендерийн тухай хууль нэлээд маргаан дагуулаад байгаа юм. УИХ-ын гишүүн Ч.Лодойсамбуу байнгын хорооны хуралдааны үеэр дараах байр суурийг илэрхийллээ.

УИХ-ын гишүүн Ч.Лодойсамбуу: Ер нь, хэн нь эхлээд мөнгөө гаргах нь хоёрдугаар асуудал. Хэн нь ч хийсэн эцэст нь төсвөөс л зардлаа нөхнө. Хэнээр хийлгэх гэж байгаа вэ гэдэгт чинь сонгон шалгаруулалт алга байна гээд маргаан, эрсдэл үүсээд байгаа юм биш үү, үүнийгээ боловсронгуй болгохгүй юм уу гэсэн санал дахин, дахин хэлээд байгаа юм. Тэрнээс яаралтайгаар ажил хийхгүй бол болохгүй гээд байгаа асуудлыг ойлгож байгаа шүү дээ.    

Энэ Засгийн газар, шинээр бүрэлдсэн парламент, шинээр сонгогдсон гишүүд бид нэг зүйлийг анхаарахгүй бол болохгүй байна. Бид ерөөсөө энэ засаглалынхаа зарчмыг нурааж хаях хэрэгсэл болоод байна. Шинээр сонгогдсон гишүүд гэсэн үг. Засгийн газраас оруулж ирж яаралтайгаар хэлэлцүүлье гэж байгаа бүх үйл ажиллагаа бол шинэ дээр нь гялалзуулъя л гэж байгаатай адил юм.

Гялалзуулахдаа юу хийж байна вэ гэхээр өнгөрсөн парламентаар амжаагүй, хийгээгүй ажлаа гүйцээхийн тулд УИХ-ын Дэгийн тухай хуульд өөрчлөлт оруулж байгаа. Хүсэж байгаа төсвөө батлуулахын тулд Төсвийн тогтвортой байдлын тухай хуулиа дахиад өөрчилж орж ирж байна. Ажил хийх нэрийдлээр нээлттэй сонгон шалгаруулалтыг байхгүй болгоод байна. Үндсэндээ шинээр сонгогдсон гишүүд томоохон зарчмын зүйлүүдээ нураадаг хэрэгсэл болоод байна. Үүнийг ойлгоод нам намынхаа бүлэг дээр асуудлуудаа хэл. Засгийн газраас оруулж ирж байгаа саналыг болиулах, буцаах, саналаа хэлэх, шаардлага хүргүүлэх эрхтэй шүү дээ. Энэ нь ажилд садаа болж байгаа хэрэг биш. Ажлыг л сайн хийх гэж орж ирсэн болохоос дөрвөн жил гишүүн байж үзэх гэж орж ирж байгаа биш дээ.