“Voanews”-т нийтлэгдсэн “Mongolia finds ways to align with the West without alarming China, Russia” нийтлэлийг орчуулан хүргэж байна.

Орос, Хятад хоёрын дунд орших далайд гарцгүй Монгол Улс хойд, урд хөршүүдээ түгшээхгүйгээр барууны ардчилсан орнуудтай харилцах харилцаагаа тэнцвэржүүлэх арга замыг хайж байна гэж шинжээчид үзэж байна.

Монгол Улс Хятад, Орос хоёрыг гадаад, эдийн засгийн тэргүүлэх чиглэл гэж үздэгээс гадна худалдааны гол эргэлт нь энэ хоёр улсаар дамжин өнгөрдөг ч АНУ, Япон, Европын холбоо болон бусад ардчилсан орнуудтай харилцаагаа гүнзгийрүүлэн хөгжүүлэхийг эрмэлздэг.

Нью-Йоркт төвтэй улс төрийн зөвлөх үйлчилгээний “Park Strategies”-ийн ахлах Шон Кинг "Тэд биднийг Москва, Бээжингийн эсрэг жин болгон харилцаагаа гүнзгийрүүлж байгаа нь ухаалаг хэрэг" гэж Америкийн дуу хоолойд ярьжээ.

АНУ-ын Төрийн нарийн бичгийн дарга Антони Блинкен Ази дахь хамгийн сүүлийн айлчлалаа энэ сарын эхээр Монголоор өндөрлөж, тус улс нь Энэтхэг-Номхон далай дахь АНУ-ын "гол түнш" бөгөөд хоёр улсын харилцаа нь өдөр бүр шинэ түвшинд хүрч байгааг онцолсон.

Японы Ерөнхий сайд Фүмио Кишида наймдугаар сарын эхээр Монгол Улсад айлчлах байсан ч Японд газар хөдлөлт болсон тул айлчлал цуцлагдсан. Харин наймдугаар сарын 13-нд хоёр тал утсаар ярьсан. Сүүлийн хэдэн сард Монголд айлчилсан ардчилсан орнуудын удирдагчдын тоонд ХБНГУ-ын Ерөнхийлөгч Франк-Вальтер Штайнмайер, Их Британийн Гадаад хэргийн сайд Дэвид Камерон, АНУ-ын Төрийн нарийн бичгийн даргын орлогч Курт Кэмбелл, Филиппиний Гадаад хэргийн сайд Энрике Манало нар багтаж байна. Францын Ерөнхийлөгч Эммануэль Макрон өнгөрсөн онд тус  улсад анх удаа айлчилсан.

Америкийн Монгол судлалын төвийн үүсгэн байгуулагч, Чарльз Крусекопф "Америкийн дуу хоолой"-д өгсөн ярилцлагадаа "Монгол Улстай ойр дотно харилцаатай байж бүс нутагтаа тодорхой хэмжээний оролцоотой байх, бүс нутагтаа найзтай байх нь АНУ-ын хувьд чухал гэж бодож байна” гэжээ.

АНУ-ын Батлан ​​хамгаалах яамны 2019 оны зургаадугаар сарын "Энэтхэг-Номхон далайн стратегийн тайлан"-д Монгол Улсыг Шинэ Зеланд, Тайвань, Сингапурын хамт Энэтхэг-Номхон далайн ардчилсан орнуудын хуаранд багтааж, найдвартай, чадварлаг түнш гэж тодорхойлсон. Газарзүйн байрлалын хувьд дипломат маневраар хязгаарладаг ч Монгол Улс АНУ, Хятад, Оросоос эхлээд Хойд, Өмнөд Солонгос зэрэг бүх талуудтай ойр дотно харилцаатай байж чадсан нь геополитикийн ээдрээтэй нөхцөлд онцгой байр суурь эзэлдэг.

Өнгөрсөн сард болсон “Улаанбаатарын яриа хэлэлцээ”-нд Их Британи, Хятад, Япон, Орос, Өмнөд Солонгос, АНУ зэрэг найман орны төрийн албан хаагч, стратегийн мэргэжилтнүүд Улаанбаатарт чуулж, Азийн хамгийн тулгамдсан стратегийн асуудлууд, тэр дундаа Солонгосын хурцадмал байдлын талаар хэлэлцсэн.

Крусекопф "Монгол бол бүс нутгийн бүх орны хүмүүс цугларах ховор газруудын нэг бөгөөд төвийг сахисан газар гэж үздэг” хэмээжээ. 2022, 2023 онд Москва Украины газар нутгийг өөртөө нэгтгэснийг буруушааж, Оросын цэргийг тус улсаас гаргахыг шаардсан НҮБ-ын тогтоолд Монгол Улс түдгэлзсэн санал өгсөн. Мөн өнгөрсөн онд Монгол Улсын Ерөнхийлөгч Ухнаагийн Хүрэлсүх, Ерөнхий сайд Лувсаннамсрай Оюун-Эрдэнэ нар БНХАУ-ын удирдагч Ши Жиньпин, Төрийн Зөвлөлийн Ерөнхий сайд Ли Цян нартай тус тус уулзсан.

Мөн Ерөнхий сайд Л.Оюун-Эрдэнэ АНУ-д төрийн айлчлал хийхээс ердөө сарын өмнө БНХАУ-д айлчилж, хоёр улс Стратегийн гуравдагч хөршийн түншлэлийн тухай АНУ-Монголын хамтарсан мэдэгдэл гаргасан. Блинкений айлчлалын өмнөхөн Монгол Улс жил бүр зохион байгуулдаг “Khan Exploration” нэртэй цэргийн сургуулилалт хийж, АНУ, Япон төдийгүй БНХАУ-ын цэргүүд оролцсон юм. Крусекопф “Монголын гадаад худалдааны дийлэнх нь Хятадаар дамждаг ч Монгол Улс бүс нутгийн бүх хүмүүстэй найз. Мөн энэ бүс нутагт брокер гэж хэлж болно” хэмээжээ.