Монголын Бурхны Шашинтны Төв Гандантэгчэнлин хийдэд наймдугаар сарын 9-22-ны хооронд Дүйнхорын ван буюу Цогт цагийн хүрдний их авшиг номыг айлдаж байна.
Бурхны шашны тарины номлол дотор хамгийн дээд нь Дүйнхорын ном юм. Тус номыг олон түмэнд заах, дэлгэрүүлэхэд хамгийн эхэнд авшиг хүртээдэг. Далай лам 34 удаа Дүйнхорын авшгийг хайрласан байдаг. Түүний 22 дахь удаагийн Дүйнхорын их авшиг 1995 онд Гандантэгчэнлин хийдэд болж байжээ. Тиймээс энэ удаа болж буй Даян дэлхийн амар амгалангийн төлөө уриат Дүйнхорын вангийн номын айлдвар Монгол Улсад 30-иад жилийн дараа болж байгаа гэдгээрээ онцлог, ховор үйл явдал юм.
Энэхүү номын үйл ажиллагаанд гадаадын зочид төлөөлөгчид, олон сүсэгтэн манай улсад иржээ. Мөн орос, англи, хятад, япон, солонгос, монгол гэсэн зургаан орны хэлээр Дүйнхорын авшгийг орчуулж, сүсэгтэн олонд хүргэж байгаа бөгөөд гадаадын 15 орноос 600 гаруй сүсэгтэн ирж, номын дуу сонсож байгаа аж.
Монголын бурхан шашинтны төв Гандантэгчилэн хийдийн хэвлэл мэдээлэл, олон нийттэй харилцах албаны дарга Ч.Бямбажаргал "Наймдугаар сарын 9-22-ны хооронд Монголын бурхан шашинтны төв Гандантэгчилэн хийдэд Дүйнхорын ван буюу Цогт цагийн хүрдний авшиг хүртээх номын үйл ажиллагаа болж байна. Энэхүү номыг дээрхийн гэгээнтэн 14 дүгээр далай лам 1995 онд Монголд Гандантэгчилэн хийдэд айлчилж байснаас хойш ахиж түүнээс хойш айлдаагүй байж байгаад өнөө жил айлдаж, 1600 орчим лам оролцож байна. Даян дэлхийн амар амгалангийн төлөөх Цагийн хүрдний Их авшиг-2024 номын айлдварыг Дээрхийн гэгээнтэн XIV Далай ламын Намжал, Жүд-дод дацангуудын Хансүр, Монголчуудын язгуур үндэсний багш Жадо Ринбүчи гэгээнтэн айлдаж байна.
Наймдугаар сарын 9-11-ны өдрүүдэд дотоод зан үйл буюу газар авах, хот мандлыг бүтээх зан үйлүүд болсон. 12-16-ны хооронд “Мөрийн гурван эрхэм”, "Бодьсадвын 37 гарын авлага" өмнөтгөл номыг айлдсан. Энэхүү номыг айлдаж байгаа нь лүн хүртэх гэж буй лам шавь хуврагууд, сүсэгтэн олны сэтгэлийг засах, сэтгэлийг бэлтгэх ёс заншлаар урдатгал ном айлдсан.
Дүйнхорын ван авшиг ном нь бурхны шашинд ихээхэн чухал номд тооцогддог. Бурхны шашны тарнийн номлолын хамгийн дээд нь Дүйнхорын ном. Тухайн номыг олон түмэнд дэлгэрүүлэхэд хамгийн эхэнд авшиг хүртээдэг. Дүйнхорын номыг сонсохын сонсож, нууц тарнийн авшгийг хүртэхийн тулд Нууц тарнийн санваар, Ангид гэтлэх санваар, Бодьсадвын санваарыг өмнөтгөл болгон айлдах ёстой байдаг. Бэлтгэл номын айлдвар нь Дүйнхорын авшиг хүртэх гэж буй хүний дотоод сэтгэлийг ариусгах, зөв сэтгэлтэй болгоход тустай. Сэтгэлд нь номын огшин суулгаж байна гэж ойлгож болно.
Наймдугаар сарын 17-ноос эхэлж авшиг хүртээж эхэлсэн. Авшиг гэдэг нь их хөлгөний, түүн дотроо тарнийн ёсны гүн гүнзгий, ялангуяа Дүйнхорын ван бол дээд ёсны авшиг. Үүнийг сонссоноор хүмүүс Дүйнхорын номыг үзэж судлах эрхийг хүртэж байгаа юм. Дүйнхорын номыг үзэж, сурснаар өөрсдөө шид бүтээлийг олж авч, Дүйнхор бурхныг бясалгал бүтээл хийх, мөн өөрийн аливаа нэгэн эрдмийг туулж, шамбалын оронд төрөх тэргүүтэй ач холбогдолтой. Дүйнхорын номд ертөнцийн шүтэн барилдлагыг өгүүлсэн байдаг. Амар амгалан, жаргалтай байх тухай Дүйнхорын ванг айлдаж байна" гэлээ.
Нийтийн эв нэгдэл, амар амгаланд эерэг нөлөө үзүүлдэг Дүйнхорын авшгийг олон тооны хүмүүст хүртээх уламжлал байдаг байна. Дээрхийн гэгээн Далай лам 1954 онд Төвөдийн Лхаст авшгийг анх удаа хүртээсэн бөгөөд дэлхий даяар түүнээс хойш ойролцоогоор хоёр сая хүн түүний хүртээсэн Дүйнхорын авшигт оролцоод байгаа тоо баримт байдаг аж.
Наймдугаар сарын 21-ний өдөр хот мандалд мөргөх үйл ажиллагаа болно.
Наймдугаар сарын 22-ны өглөө Жадо Ринбүчи багш олон шавь нарт насны авшиг айлдана. Үүний дараа Гандантэгчэнлин хийдийн зүгээс Дүйнхорын авшиг хайрласан багшдаа бат оршил өргөнө.
