УИХ-ын ээлжит бус хуралдаанаар Засгийн газраас өргөн барьсан хуулийн төслүүдийг яаралтай горимоор хэлэлцэж байна. Энэ үеэр гишүүд асуулт асууж, хариулт авлаа.
УИХ-ын гишүүн Д.Энхтүвшин: Эрүүгийн хэрэг хянан шийдвэрлэх тухай хуульд таслан сэргийлэх арга хэмжээ авахдаа ААН-үүдийн дансыг хааж, үйл ажиллагааг нь хязгаарлаад байгаа. Мөн захирлуудыг нь барьж, хорьж байж хэргийг нь хянан шийдвэрлээд байна. Энэ дээр ямарваа нэг өөрчлөлт орох уу. Нэлээд ерөнхийгөөр орчихсон байгаа учир энэ заалтууд байгаа юу гэж асуух гэсэн юм. Тэгэхгүй бол үүнийг хэрэгжүүлж байгаа байгууллагууд нь бизнесийн орчны талаар мэдэхгүй шууд дансыг нь хаачихаар бусад юм нь болчихдог юм шиг бодоод байгаа. Үүн дээр бодитой өөрчлөлт гарахгүй бол компаниуд дампуурах хэмжээнд хүрээд байна.
ХЗДХ-ийн сайд О.Алтангэрэл: Хувийн хэвшил хүний эрхийн чиглэлээр тодорхой алхам хий, судалгаа гарга гэж Ерөнхий сайдаас үүрэг өгсөн. Ер нь, журмаар зохицуулж байгаа болон хуулиар зохицуулж байгаа олон зүйл бий. Тэр байтугай журам их байна гэж чуулганы нээлтийн үеэр УИХ-ын дарга Д.Амарбаясгалангийн үгэнд гарсан. Үүн дээр бид тодорхой ажлуудыг хийж байгаа. Албан тушаалтнаас хамааралтай журмаар зохицуулдаг харилцаа их байхаар албан тушаалтны үзэгний үзүүр, эрх мэдэлтэнтэй холбоотой ААН-үүдэд хүндрэл учраад байна. Олон төрлөөр эрх нь хэн нэг эрх мэдэлтний үзгийн үзүүрээр шийдэгдэж байна.
Нөгөөтэйгүүр, ААН-үүдийн дансыг хааж байна гэж хувийн хэвшлийн зүгээс маш их ирж байгаа. Яг хаана, хэчнээн ААН-ийн, ямар хэмжээний дансыг хаасан юм гэдэг статистик, мэдээлэл ирүүлээч гэхээр мэдээлэл сайн ирүүлэхгүй байна. Бид худалдаа аж үйлдвэрийн танхимтай хөрөнгө оруулалт болон бизнесийн эрхзүйн орчны чиглэлээр хамтран ажиллах өргөн их хүсэлтэй байна. Өнөөдөр ХЗДХЯ-д боловсруулалтын шатанд явж байгаа хувийн эрхзүйтэй холбоотой 10 гаруй хуулийн төсөл байна. Энэ бүр дээр бизнесийн төлөөлөл оролцоод өөрсдийн эрх ашгийг тусгуулаад явж болно.
Данс хаах явдал бол Эрүүгийн хэрэг хянан шийдвэрлэх ажиллагааны явцад, иргэд ААН-ын маргааны түвшинд, татварын байгууллагатай холбоотойгоор хаагдаж байгаа явдлууд байна. Тэгэхээр хаана ямар асуудал байна, хаана ААН-үүдийн эрх ашиг зөрчигдөөд байна гэдгээ харах цаг болчихсон.
Мөн гадаадын хөрөнгө оруулагчидтай холбоотой маш олон муу түүх байна. Монгол Улсын шүүхээр шийдвэрлэдэг. Эрх ашгаа хангуулъя гээд шүүхийн шийдвэр гарахаар гаргасан шүүхийн шийдвэр нь биелдэггүй гээд ХЗДХ-ийн сайдын нэр дээр ирсэн гадаадын хөрөнгө оруулагчидтай холбоотой маш олон гомдол байна. Тэгэхээр бид
Монгол Улсын Тэргүүн шадар сайд Л.Гантөмөр: Ер нь, энэ асуудлыг бид ажил хэрэг болгоно. Шүүхийн шийдвэргүйгээр данс хаадаг байдлыг таслан зогсоох хэрэгтэй. Дээр нь өр төлбөртэй хүн гадагшаа явж болдоггүй байдлыг болиулах хэрэгтэй, Дампуурлын хуулийг тодорхой болгох хэрэгтэй. Хүн бизнес хийгээд, ажил хийгээд алдаа гаргасных нь төлөө насаараа шийтгүүлдэг байж болохгүй шүү дээ. Үүнийг ойрын хугацаанд шийдээд явах учиртай.
Гадаадын хөрөнгө оруулалттай ААН-үүдээс ирсэн гомдол 82 байгаа юм билээ. Шийдэгдсэн нь 18, хүлээгдэж байгаа нь 68. Тэгэхээр гомдол байгаа байхгүй юу. Бид үүнийг мэдээгүй, хараагүй юм шиг явж ерөөсөө болохгүй. Ил тод, нээлттэй яриад хөрөнгө оруулагчдынхаа асуудлыг тодорхой шийдэж чаддаг улс болох ёстой.
