УИХ-ын ээлжит бус хуралдаанаар Засгийн газраас өргөн барьсан хуулийн төслүүдийг яаралтай горимоор хэлэлцэхээр болсон. Тэгвэл өчигдөр Төсвийн байнгын хороо хуралдаж, Монгол Улсын 2024 оны төсвийн тухай хуульд өөрчлөлт оруулах тухай хуулийн төсөлтэй хамт өргөн мэдүүлсэн хууль, тогтоолын төслүүдийг хэлэлцэх эсэхийг хэлэлцсэн юм. Энэ үеэр УИХ-ын гишүүн Х.Ганхуяг төсвийн зарлагыг яагаад ингэж тэлснийг асууж хариулт авлаа.

УИХ-ын гишүүн Х.Ганхуяг: 2024, 2025, 2026 онуудад зарлагыг нэлээд тэлсэн байдалтай оруулж ирээд байна. Засгийн газрын мөрийн хөтөлбөр дээр төрийн албан хаагчийн тоог 10 хувиар багасгана, цомхон төрийн албатай болно гэсэн байсан. Гэтэл зөрүүлээд оруулж ирж байгаа төсөв дээр урсгал зардал нь зөвхөн энэ онд 1.2 их наяд төгрөгөөр нэмэгдэж байна. Бид улам л том засагтай, олон төрийн албан хаагчтай төрийг бий болгох гээд байна. Эсхүл саяны тооцооллын аргаараа зээлээ нэмж авах гээд байгаа юм уу.

Тэгэхээр 2025, 2026 оны төсвийн мэдэгдлээ хэрхэн яаж төсөөлж байгаа юм. Эдийн засаг ямар байх юм, ямар орлого олно гэж төсөөлж байгаа юм. Энэ тал дээр хариу авмаар байна.

Сангийн сайд Б.Жавхлан: Энэ жилийн үлдсэн хугацаанд төсвийн тэнцвэржүүлсэн орлого гурван их наяд төгрөг давж орохоор төлөвлөлөө. Сүүлийн таван жил бид тэнцвэржүүлсэн орлогоо төлөвлөхдөө нэг ч удаа алдаагүй, дутаагаагүй. Дандаа давж биелж байгаа. Энэ давсан таван жилд бид тэнцлээ сайжруулж ирлээ.