Хичээлийн шинэ жил эхлэх гэж байгаатай холбоотойгоор Боловсролын сайд П.Наранбаяр цаг үеийн асуудлаар мэдээлэл өглөө. Энэ үеэр тэрээр цэцэрлэгийн хүүхдийн мөнгийг мянган төгрөгөөр нэмж, эцэг эхчүүд тус мөнгийг даана гэдгийг хэлсэн юм.

Боловсролын сайд П.Наранбаяр: Цэцэрлэгийн хүүхдийн хоолны түүхий эдийн зардлын дүнг 1000 төгрөгөөр нэмэгдүүлэх асуудлыг Монгол Улсын Засгийн газрын тогтоолоор гаргуулахаар ажиллаж байна. Энэ ямар учиртай вэ гэхээр өнгөрсөн тавдугаар сард Засгийн газрын тогтоол гарч цэцэрлэгийн хүүхдийн хоолны мөнгө 500 төгрөгөөр нэмэгдсэн. Энэ бол түүхий эдийнх нь зардал шүү. 2500-3000 төгрөг болж байгаа. Ингэж нэмэгдсэнээр хүүхдийн авч байгаа шим тэжээлийн хэмжээ 52-53 хувьтай болж байна. Тэгэхээр гэдэс нь хонхолзож байгаа нь хэвээрээ гэсэн үг.

Мянган төгрөг нэмснээр энэ нь 72-73 хувьд хүрнэ. Үүнийг нийслэлийн цэцэрлэгүүдийн хүрээнд эхлүүлнэ. Энэ зардлыг хаанаас гаргах юм бэ гэж магадгүй. Тэгвэл уг зардлыг ээж, аав нь даана. Сард 22 удаа хүүхдээ цэцэрлэгт өглөө гэж бодоход 22 мянган төгрөгийн хоолны мөнгийг өгнө. Ингэж хоол хийх түүхий эдийн мөнгийг нэмснээр хүүхэд цадах хэмжээний шим тэжээлтэй хоол идэх боломжтой болно.

Боловсролын ерөнхий хуульд ч "эцэг эх нь хуваалцана" гэсэн заалт байдаг. Тэгэхээр энэ заалтын хүрээнд явж байгаа гэсэн үг. Бид энэ асуудлыг хөндөж тавиад найман жил болсон ч шийдэж чадахгүй яваад байна. Таны тушаасан мянган төгрөг бол таны хүүхдэд л зориулагдана гэв.