Дэлхий дахинд техник, технологи жилээс жилд тасралтгүй хурдацтай хөгжсөөр байгаа билээ. Манай орон ч дэлхий дахинтай хөл нийлүүлэн алхахын тулд техник технологийн шинэчлэлийг хийсээр байна. Үүнийг дагаад мэдээлэл технологийн чиглэлийг сонирхох, тус чиглэлээр суралцах оюутнуудын тоо ч тасралтгүй өсч байгаа юм. Хоног өдрөөр биш цаг, минут, долиор хэмжигдэх технологийн хөгжлийг зөвхөн суурь онол бүхий сургалтын материалаар хязгаарлах боломжгүй. Иймээс мэдээллийн технологийн чиглэлээр суралцаж буй оюутан залууст мэргэжлийн чиг баримжаа олгох, хамгийн дэвшилтэт программ хангамжийг эзэмшүүлэх, ирээдүйн чанартай боловсон хүчин бэлтгэх зорилгоор ХААН Банкнаас “Цалинтай дадлагын хөтөлбөр”-ийг жил бүр зохион байгуулдаг. Энэ жил хөтөлбөрийн зургаа дахь жилдээ зохион байгуулж, оюутнууд амжилттай хамрагдлаа.

ХААН Банкны 2024 оны “Цалинтай дадлагажих хөтөлбөр” зургаадугаар сарын 1-нээс наймдугаар сарын 8-ныг дуустал үргэлжиллээ. Уг хугацаанд оюутнууд мэдээлэл технологийн чиглэлээр явагдаж буй төслүүдэд ХААН Банкны мэргэжилтнүүдтэй хамтран ажиллаж, мэргэжлийн ур чадвараа дээшлүүлсэн байна. Тус хөтөлбөрт 610 оюутан хүсэлтээ ирүүлснээс таван үе шаттайгаар сонгон шалгаруулж 39 оюутан амжилттай хамрагдаж, шинэ мэдлэг, мэдээлэлтэй боллоо.

Өнгөрсөн баасан гарагт уг хөтөлбөрийн хаалтын үйл ажиллагаа болж, хөтөлбөрт хамрагдсан оюутнуудад батламж гардуулсан юм.

Дадлагажигч нараас 10 гаруй оюутнууд үргэлжлүүлэн ажиллахаар болжээ

ХААН Банкны Хүний нөөц хариуцсан дэд захирал Ш.Ганбямба: "Цалинтай дадлагажих хөтөлбөр” нь оюутны ширээнээс хараахан холдоогүй байгаа залууст лекцээс олж авсан мэдээллээ ажлын байран дээр туршиж, мэдлэг, дадал болгох нөхцөлийг бүрдүүлдэг. Нөгөөтэйгүүр ажлын байранд гарахаасаа өмнө нийгмийн харилцаанд орж, байгууллагын соёл, ажиллах орчинтой танилцаж, зөөлөн ур чадваруудыг эзэмших боломж юм. Энэ жилийн дадлагын хөтөлбөрийн онцлог нь оюутнууд нэг төслийн хүрээнд олон төрлийн ажил хийх, өөр чиг үүрэг, ур чадвартай ажилтнуудтай хамтарч ажиллаад суралцах боломжтой болсон. Ажил олгогчийнхоо хувьд ХААН Банк цахим бүтээгдэхүүн үйлчилгээг зах зээл дээр тэргүүлэн нэвтрүүлж байгаа хамт олон. Иймд мэдээлэл технологийн ажилтнуудынхаа залгамж халааг дадлагын оюутнууд дундаасаа хайдаг. Энэ жилийн хувьд 10 гаруй оюутан бидний саналыг хүлээн авч үргэлжлүүлэн ажиллахаар болж байна” гэлээ.

“Цалинтай дадлагажих хөтөлбөр”-т хамрагдсан оюутнууд ихэвчлэн анхны дадлагаа хийж байгаа нь энэ юм. Хэдийгээр богино хугацаанд дадлагажсан ч хамт олондоо дасаж, дотноссон харагдана. Тэдний зарим нь ажлынхаа анхны гарааг цахим банкаар тэргүүлэгч ХААН Банкнаас эхэлж байгаа нь том боломж гэдгийг ч онцолж байлаа. Ингээд дадлагаа амжилттай хийж, батламжаа гардан авч буй оюутнуудын сэтгэгдлийг хүргэж байна.

Дадлагын сүүлийн өдөр зуслангийн сүүлийн өдөр шиг гунигтай байлаа

ШУТИС-ийн Мэдээлэл Холбоо Технологийн сургуулийн оюутан Ш.Хангарьд: Миний хувьд ШУТИС-т Системийн аюулгүй байдлын мэргэжилтнээр суралцдаг. Энэ жилийн ХААН Банкны дадлагажих хөтөлбөрт тэнцэж орсондоо маш их баяртай байгаа. Дадлагажих хөтөлбөрөөр маш гоё хамт олон дунд орж, нэг гэр бүл болсон. Үнэндээ энэ баг хамт олныг ийм гоё гэж бодоогүй. Хамгийн сайхан харилцаа, найрсаг уур амьсгалтай хамт олны нэг хэсэг боллоо. Нэг гэр бүл шиг дэмжиж, элгэмсгээр хүлээж авсан. Саяхан л дадлага эхэлж байсан. Ажлын эхний өдөр дүрэм, журамтайгаа танилцаж, ямар үйл явцаар ажилладгийг мэдэж авсан. Дадлагын хамгийн сүүлийн өдөр зуслангийн хамгийн сүүлийн өдөр шиг маш гунигтай байлаа. Миний хувьд өвөл төгсөнө. Төгсөөд ажлын байрны номер нэг сонголт бол ХААН Банк. ХААН Банкандаа буцаж ирэх маш сонирхолтой байгаа.

ХААН  Банканд хичээлийнхээ хажуугаар үргэлжлүүлэн ажиллах болсондоо баяртай байна

ШУТИС-ийн оюутан З.Эгшиглэн: Би ШУТИС-ийн Мэдээл Холбоо Технологийн сургуулийн Өгөгдлийн шинжилгээний ангийн дөрөвдүгээр курсийн оюутан. Шинэ зүйлийг мэдэж авч, туршлага хуримтлуулсан, олон сайхан найз нөхөдтэй болсон гоё дадлага болж өнгөрлөө. Найз залуутайгаа хамт дадлагын хөтөлбөрт тэнцээд дадлагажсан. ХААН Банк надад илүү эерэг санагдсан. Хамт ажиллаж байгаа хүмүүс, хийж байгаа ажил, нэг нэгнийгээ хөгжүүлье гэсэн орчин нөхцөл, уур амьсгал нь бусад байгууллагаас ялгарах онцлог. Ганцаараа биш хамтдаа хөгжицгөөе гэдэг. Би жилийн өмнө “ХААН Банканд ажиллана” гэсэн зорилго тавьсан байсан. Тэрнийхээ хүрээнд дадлагын хөтөлбөр зарлагдах үед нэлээд тууштай байхаар шийдээд орж ирсэн. ХААН Банк бол үндэсний хэмжээний том байгууллага. Тэр утгаараа хүлээлт өндөртэй байсан. ХААН Банкнаас үргэлжлүүлэн ажиллах санал тавьсан тул  хичээлийнхээ хажуугаар ажиллах болсондоо баяртай байна.

ХААН Банкны хамт олон яг нэг гэр бүл шиг

-МУИС-ийн программ хангамжийн ангийн дөрөвдүгээр түвшний оюутан Н.Цагаадай: Монголын хамгийн том банканд анхны дадлагаа хийсэн болохоор байгууллагын соёлоос эхлээд бүх зүйлийг шинээр мэдэж авсан. Тиймээс  их гоё туршлагатай болсон гэж бодож байна. Анх их хариуцлага хүлээх юм шиг санагдаж байсан. Одоо бол хариуцлагатай мөртлөө гоё хамт олны дунд орж ажиллах хамгийн чухал санагдаж байна. Хүлээлтээс давсан гэж хэлж болно. Ирээдүйд ХААН Банканд ажиллана гэж бодож байгаа. Миний хувьд дадлагжиж байх явцад хамгийн гоё дурсамжтай үйл явдал нь төслийн багт үндсэн ажилтан шиг ажилласан болохоор туршлагажиж, өөрийгөө нээсэн нь байлаа. Баг болж ажиллаж үзсэн болохоор багийн хүмүүс хоорондоо яаж ойлголцож, ажилладгийг мэдэж авсан. ХААН Банкны ажилчдын дотоод уур амьсгал нь үнэхээр гоё. Яг нэг гэр бүл шиг. Хэн нь ч хэнээсээ юм асуусан хойрголж, цааргалахгүйгээр сэтгэлээсээ зааж өгдөг. Чөлөөт цагаар буюу цайны цагаар бие биетэйгээ цагийг өнгөрүүлэхийг зорьдог. Тэрийг нь ч гэсэн ХААН Банк дэмжиж, энэ талаар ажил өрнүүлдэг нь их таалагдсан. Миний хувьд ХААН Банкны хамгийн гоё соёл нь жижигхэн ч гэсэн лифтэнд хүмүүс орохдоо аль болох бусад хүмүүсээ багтаахын тулд цүнхээ тайлаад урдаа барьж ордог нь таалагдсан. Хэчнээн зай багатай газар байсан ч бусдыгаа хүндэлж байгаа нь гоё.

Ташрамд дурдахад ХААН Банк Монголын мэдээллийн технологийн салбарт чадварлаг мэргэжилтнүүдийг бэлтгэхэд хувь нэмрээ оруулж, “Цалинтай дадлагажих хөтөлбөр”-ийг жил бүр зохион байгуулахаар болсон билээ.