АТГ-аас УИХ-ын гишүүн асан Ц.Гарамжавт холбогдуулан хэрэг бүртгэлтийн хэрэг нээж, яллагдагчаар татан шалгаж буй. Ц.Гарамжавт үүсгэсэн хэрэгт холбогдуулан түүний үүсгэн байгуулсан нэр бүхий компаниудад нэгжлэг хийж, зарим үйлдвэрийг нь хаагаад хоёр сар гаруй болж байна. Харин уг үйл явдалтай холбогдуулан Монполимет группийн удирдлага болон ажилчид хууль хүчний байгууллагуудын энэхүү үйлдэл, тэр дундаа компаниудын данс болон ажлын байрыг нь хаасанд эсэргүүцлээ илэрхийлж, хэвийн ажиллах нөхцөлөөр хангахыг удаа дараа шаардсаар байгаа юм.
Тэгвэл өнөөдөр Монполимет группийн ТУК-ийн дарга Н.Мөнхнасан хууль хүчний байгууллагын шударга бус үйлдлийн улмаас 1000 гаруй ажилчинтай ААН дампуурах нөхцөл үүслээ гэж мэдэгдлээ.
Тэрээр "Монполиметийн 6 салбар компанийн нийт 46 дансыг ямар нэгэн үндэслэлгүйгээр хааснаас өнөөдрийн байдлаар 19 данс битүүмжлэлтэй хэвээр байна. Эрүүгийн хэргийн бүх ажиллагаа хуульд нийцэж, эрх бүхий албан тушаалтны зөвшөөрлөөр явах ёстой байтал Хөгжлийн банкны гэх хэрэгт ямар ч хамааралгүй компаниуд болон гэр бүлийн гишүүдийн бүх хувийн данснуудыг хаасан нь Монгол Улсын Үндсэн хуулиар олгогдсон эрхийг зөрчиж, тэр дундаа хүний эрх эрх чөлөөнд халдсан үйлдэл болж байна.
Бид Авлигатай тэмцэх газар болон Нийслэлийн Прокурорын газарт Үндсэн хуульд заасан хөдөлмөрлөх эрхээ сэргээлгэж, үйл ажиллагаа нээлгэх, бусад хууль бус ажиллагааг таслан зогсоолгох тухай 100 гаруй хүсэлт илгээсэн боловч өнөөдрийг хүртэл тодорхой үндэслэл шалтгаангүйгээр татгалзсаар байна.
