Гадаадад сураад Хятадад буцаж ирсэн оюутнууд эх орондоо ажилд орох өргөдөл гаргахдаа тухайн сургуульдаа үнэхээр сурсан гэдгээ баталгаажуулах шаардлагатай болдог.

Хятадын Эрдэм солилцооны үйлчилгээний төв (CSCSE) долоодугаар  сарын 24-нд гаргасан зөвлөмждөө, Хятадын гадаадад мэргэшлийг хүлээн зөвшөөрөх эрх бүхий яамны харьяа байгууллага болох (CSCSE) хэд хэдэн их, дээд сургуулийн магистр, докторын зэрэгтэй холбоотой мэдээллийг "шаардлага хангахгүй” гэж үзжээ. Зөвлөмжид дурдсан 13 их сургуулийн зургаа нь Филиппинийх, тав нь Монголынх, Энэтхэгийн  хоёр сургууль байна.

CSCSE-ийн мэдээлснээр, Хятадын оюутнуудын эрх ашгийг хамгаалах, олон улсын боловсролын зах зээлд дэг журмыг сахиулах зорилгоор 13 их сургуулийн олгосон эрдмийн зэргийн баталгаажуулалтыг чангатгах аж. Эдгээр байгууллагуудын итгэмжлэлийг баталгаажуулахад шаардагдах хугацааг CSCSE-д ирүүлснээс хойш ажлын 60-аас доошгүй өдөр хүртэл сунгасан байна. Ердийн шалгалт нь ихэвчлэн ажлын 10-15 хоног болдог. CSCSE нь ихэвчлэн зэрэг олгосон гадаадын байгууллагатай холбоо барьж баталгаажуулдаг.  Энэ нь CSCSE-ээс гаргасан тав дахь мэдэгдэл бөгөөд 2021 онд анхаарал хандуулж буй байгууллагуудын нэрийг олон нийтэд зарлаж байжээ. Тухайн үед CSCSE нь COVID-19 тахлын үеэр Хятад оюутнуудад чиглэсэн эргэлзээтэй эсвэл стандарт бус онлайн сургалт явуулж байгаа гадаадын байгууллагуудын олон тооны тайланг хүлээн авсан. Өмнөх мэдэгдэлд тус бүр гурваас зургаан их сургуулийг жагсаасан байсан.

Дээр дурдсан 13 их сургуулийн бараг тал нь Филиппинд байна. Үүнд Филиппиний Сент Полын их сургууль, Филиппиний Христийн их сургууль, Сент Доминик Савио коллеж, Филиппиний эмэгтэйчүүдийн их сургууль, AMA их сургууль, Филиппиний их сургуулийн лицей - Батангас зэрэг орж байна.