Хамтарсан Засгийн газар байгуулан ажиллаж байгаа МАН, АН, ХҮН намын дарга нар өнөөдөр “Хурдтай хөгжлийн зориг-Хамтарсан Засгийн газрын гэрээ”-нд гарын үзэг зурсан. Тэгвэл гурван дарга гарын үсэг зурсны дараахнаас АН-ын гишүүд намын даргаа Үндэсний бодлогын хороо, Улс төрийн зөвлөл, УИХ дахь АН-ын бүлгийн шийдвэргүйгээр Хамтарсан Засгийн газрын гэрээнд гарын үзэг зурлаа гэж шүүмжилж эхлээд байна.

АН-ын бүлгийн гишүүн, УИХ-ын гишүүн Л.Мөнхбаясгалан: АН-ын бүлгийн гишүүд хамтарсан ЗГ-ын үйл ажиллагааны хөтөлбөр, гэрээг хэлэлцээд сууж байтал АН ын намын дарга нар гүйж очоод Гэрээг батлаад гарын үсэг зурчихлаа. Бүлэг эсрэг шийдвэртэй. Бид үүнийг хүлээн зөвшөөрөхгүй! Бүлэг хариуцлага хүлээхгүй.

АН-ын бүлгийн гишүүн, УИХ-ын гишүүн Ө.Шижир: Хамтарсан Засгийн газрын гэрээг Ардчилсан намын ҮБХ, УТЗ, намын бүлэг гээд намын шийдвэр гаргах эрх бүхий аль ч бүтцээр хэлэлцэж батлаагүй. Манай намын бүлгээр хэлэлцээгүй шүү, яг одоо бүлэг хуралдаж байна. Намын нарийн бичгийн даргын үүрэг гүйцэтгэгч болон бүлгийн даргаас хүртэл энэ гэрээн дээр эцэслэж санал өгөөгүй гэж яг одоо бүлэг дээр ярилцаж байхад гэрээг нь зурж байдаг. Арай дэндүү байна шүү.

Энэ гэрээг АН-ын ажлын хэсгийн гишүүдэд 13:46 минутад өгөөд бүлэг 15:00 цагаас зарлаад одоо ч хуралдаж байна уг нь…. Хурлын эхэнд бүлгийн дарга О.Цогтгэрэл ОХУ-ын сайд ирсэн учир намын дарга Лу.Гантөмөр чөлөө хүсэж байна гэж танилцуулсан. Гэтэл юун гадаад уулзалт, зочин. Хэлэлцүүлж дуусаагүй, санал аваагүй гэрээгээ зурж байж… АН-аас сонгогдсон их хурлын гишүүд уг нь агуулга, заалт тус бүрээр нь ингээд хэлэлцэж байсан юмсан гэжээ.

-АН-ын бүлгийн гишүүн, УИХ-ын гишүүн Д.Цогтбаатар: АН бүлэг яг одоо хуралдаж байна. Бүлгийн шийдвэр эцэслэж гараагүй байхад нөхөр Л.Гантөмөр гуай биднийг төлөөлж МАН-ын даргатай гарын үсэг зурж байгаа нь бүдүүлэг байна. Хаа хаанаа ёс зүйтэй баймаар байна шүү, нөхөд өө гэв.