Баянзүрх дүүргийн 26 дугаар хороо, Дүнжингарав худалдааны төвийн урд өнгөрсөн нэгдүгээр сард хий тээвэрлэж явсан том оврын машин дэлбэрлэснээс болж олон иргэн амь нас, эд хөрөнгөөрөө хохирсон. Тэдний нэг бол 207 дугаар байрныхан. Тус байрны 63 өрхийн 218 оршин суугчид өнөөдрийг хүртэл түрээсийн орон сууцанд амьдарч байна. Хуулийн байгууллагын хамтарсан ажлын хэсгээс гал гарсан шалтгаан нөхцөл, учирсан хохирлын хэр хэмжээг тогтоохоор ажиллаж дүгнэлт гаргаж буй. Дэлбэрэлтэд өртсөн тус байрыг сэргээх засварлахаас илүүтэй шинээр барих нь зүйтэй гэсэн урьдчилсан дүгнэлт гарсан.
Тэгвэл тус байрыг нураах, сэргээн засах эсэх асуудлаар Нийслэлийн хөрөнгө оруулалтын газрын дарга С.Цэдэнсодномоос тодрууллаа.
-Дэлбэрэлт болсноос хойш нэлээд хугацаа өнгөрлөө. Дэлбэрэлтэд өртсөн 207 дугаар байртай холбогдох ажил ямар шатандаа явж байгаа вэ?
-Дэлбэрэлтэд өртсөн 207 дугаар байртай холбогдох асуудалд Нийслэлийн Засаг дарга зургаадугаар сарын 10-ны өдөр захирамж гаргаж, барилга байгууламжийн ажлын даалгавар боловсруулах ажлын хэсэг байгуулсан. Тус ажлын хэсгээс мэргэжлийн зөвлөх баг авч, тухайн барилга байгууламжийн нүүрсхүчлийн хий бетон арматурт хэрхэн нөлөөлсөн талаарх лабораторийн дүгнэлт гаргуулсан. Тухайн дүгнэлтээр 1-6 давхарт нэвчих боломж үүссэн гэх дүгнэлт гарсан хэдий ч саармагжуулах боломжтой гэдгийг бидэнд танилцуулсан. Үүнтэй холбоотой ажлуудаа долдугаар сарын 26-нд дууссан бөгөөд иргэдтэй долдугаар сарын 30-нд уулзсан. Ингэхдээ хоёр нөхцөл танилцуулсан. Засварын ажил хийхэд УОК-оос гаргасан 4.2 тэрбум төгрөгийн төсөв, дээрээс нь тухайн барилгын цонх хаалга, шал, дотор заслыг бүхэлд нь солихоор 2.6 тэрбум, нийтдээ 6.9 тэрбум төгрөгийн дүнтэй зөвхөн засварын ажлын төсөв гарсан. Үүн дээр нэмэгдээд барилга байгууламжийг газар хөдлөлтөд тэсвэртэй болгох, тухайн барилгад ямар хүчитгэл хийх талаар тооцооллуудыг гаргасан. Үүнтэй холбоотой төсөв яг батлагдаагүй ч ойролцоогоор 2-3 тэрбум төгрөгийн төсөв гарна гэдэг тооцоод байна. Ингэхээр сэргээн засварлахад нийтдээ 10 тэрбум төгрөгийн төсөвтэй болчихоод байна. Тухайн барилгын метр квадратыг 2.5 сая төгрөгөөр барина гэж тооцох юм бол 10 тэрбум болж байна. Засварын ажил хийх, буулгаад шинээр барих хоёр бараг адилхан зардал гарна. Бид иргэдэд үр ашгийн хувьд шинээр барих нь илүү үр дүнтэй юм байна гэдэг саналыг хэлсэн. Эхлээд тус барилгыг 2.6 тэрбум төгрөгөөр буулгах төсвийг УОК, Барилга хот байгуулалтын яамнаас гаргах боломжтой. Нийтдээ буулгаад шинээр барих төсвийг 12.6 тэрбум төгрөг гэсэн тооцоо гаргаад иргэдэд танилцуулсан.
-Барилгыг буулгаад шинээр барих, эсвэл засварын ажил хийхэд хэр хугацаа орно гэж тооцоолсон бэ?
-Хуулийн хугацаагаараа явна. Тухайн барилгыг буулгахад Монгол Улсын барилгын дүрэм, барилга байгууламж буулгах үйл ажиллагааны дүрэм гэж бий. Энэ дүрмийн 2.1-д байгалийн болон бусад хүчин зүйлсийн улмаас ашиглах бололцоогүй болсон, мэргэжлийн байгууллагаас цаашид ашиглах боломжгүй бөгөөд осол гарах нөхцөл байдал үүссэн, хүчитгэл бэхэлгээ хийсэн ч эдийн засгийн хувьд үр ашиггүй нь тогтоогдсон техникийн дүгнэлт гарсан, мөн түүнчлэн өмчлөгч нь буулгахаар шийлвэрлэсэн барилга байгууламжийг буулгах үндэслэл болно гэж заасан байдаг. Тухайн барилгыг хүчитгэл засвар хийхэд шинээр барихтай адилхан өртөг гарч байгаа учраас буулгаад шинээр барих нь зах зээлийн хувьд ч үнэ цэнийн хувьд ч ашигтай талаар оршин суугчдад санал болгосон. Хуучин байрыг хүчитгээд орсон ч эдийн засгийн хувьд оршин суугчдад таатай биш байх гэж бодож байна.
-Буулгаад шинээр барих, хүчитгэл хийж засварлахын аль аль нь хугацаа их орохоор болчихлоо. Энэ хугацаанд оршин суугчдын түрээсийн мөнгийг үргэлжлүүлээд олгох уу?
-Холбогдох зардлыг Улсын онцгой комиссын гаргасан шийдвэрийн дагуу иргэдийн түрээсийн байрны зардлыг шийдээд явна. Гарч байгаа бүх зардлыг нийслэл хариуцна. Нэн тэргүүнд бид иргэдэд тулгамдаж байгаа асуудлыг шийдвэрлэнэ. Дараа нь шүүхийн шийдвэр бүрэн гарсан хойно хохирол учруулсан этгээдээс гарсан зардлыг нэхэмжилж улсыг хохиролгүй болгоно. Оршин суугчдын зүгээс барилгыг нураах болон шинээр барих компанийн талаарх мэдээлэл, хэдий хэр хугацаанд ажил гүйцэтгэх талаарх мэдээллийг цаг тухай бүрт авч байхыг хүссэн.
Оршин суугчид өнөөдрийг хүртэл түрээсийн орон сууцанд амьдарч байгаа бөгөөд түрээсийн хугацаа ирэх 9 дүгээр сарын 30-ны өдөр дуусна. Хэрэв барилгыг нурааж, дахин шинээр баривал оршин суугчид үргэлжлүүлэн түрээсийн байранд амьдрах болно. Барилга бүрэн ашиглалтад орж дуустал нийслэлээс оршин суугчдын түрээсийн төлбөрийг үргэлжлүүлэн төлөх юм.
