Засгийн газрын хуралдаанаас гаргасан шийдвэрийн талаар Монгол Улсын сайд, 20 минутын хот төслийн Үндэсний хорооны даргаар Р.Эрдэнэбүрэн, Нийслэлийн Засаг дарга Х.Нямбаатар нар мэдээлэл хийлээ.

Нийслэлийн Засаг дарга Х.Нямбаатар: Улаанбаатар хотын түгжрэлийг бууруулах, төвлөрлийг сааруулах, иргэдэд төрийн үйлчилгээг ойртуулах, хамтарсан Засгийн газрын үйл ажиллагааны хөтөлбөрт тусгах гол, гол дэд бүтцийн төсөл хөтөлбөрүүдийн талаар танилцуулгыг өнөөдрийн Засгийн газрын хуралдаанд хийлээ.

Ингэхийн тулд төрийн захиргааны төв байгууллагуудыг Богд уулын урд талд гаргах, Шинэ Зуун мод хот руу чиглэсэн урсгалыг бий болгох агуулга бүхий, хоорондоо уялдаатай таван төслийг танилцуулсан.

Туулын хурдны замыг наймдугаар сард багтаан төр хувийн хэвшлийн түншлэлээр олон улсын нээлттэй тендер зарлана. Энэ замаас дээшээгээ саран хэлбэрээр их авч тойрог хурдны замыг барина. Тойрог хурдны замыг барихтай холбоотой олон улсын зөвлөх үйлчилгээний тендер зарлах төсвийг энэ оны төсвийн тодотголд тусгах шийдвэр гаргалаа.

"Өөдөө тэмүүлэх Монгол" нэртэй гүүр Туулын хурдны замаас урагшаа үргэлжилж, Кувейтийн аманд төрийн захиргааны төв байгууллагуудын нэгдсэн байрыг барих замаар төвлөрлийг сааруулна. Цаашлаад шинэ Зуун модод хологдох Богд уулсын урд тал руу Улаанбаатар хотын шинэ суурьшил тэлэх төлөвлөгөө танилцуулсан. Үүнээс гадна нийслэлд хэрэгжиж эхэлж байгаа дэд бүтцийн төслүүдийг танилцуулсан.

Монгол Улсын сайд, 20 минутын хот төслийн Үндэсний хорооны даргаар Р.Эрдэнэбүрэн: Хамтарсан Засгийн газрын гэрээнд оруулах томоохон төслүүдийн талаар танилцуулгыг өнөөдрийн хуралдаанд танилцууллаа. Төрийн байгууллагуудаа Богд уулын урагшаа гаргах нь зөв гэж үзэж тодорхой төслүүдийг танилцууллаа.

Энэ хүрээнд "Go Mongolia" буюу "Өөдөө тэмүүлэх Монгол" нэртэй 900 метр гүүр хийх. Гүүрний цаад тал руу 5.6 км, зургаан эгнээ авто зам бүхий тунель барих, төрийн захиргааны байгууллагуудын нэгдсэн цогцолборыг Хан-Уул дүүргийн 14-р хорооны нутаг дэвсгэрт барина. Хөшигтийн хөндийн бүтээн байгуулалтын хүрээнд их багтаамжийн нийтийн тээврийн хэрэгсэл, метротой уялдуулан хөнгөн галт тэрэгний шугамын төсөл хэрэгжүүлэх, Туулын хурдны зам, Шинэ тойрог зам гэх мэт үндсэн томоохон төслүүдийг Засгийн газрын хуралдаанд танилцууллаа.