Хотын захиргааг төвөөс гаргаж Яармаг руу нүүлгэхээр байрыг нь ашиглалтад оруулаад 4 жил болж буй. Тэгвэл хотын захиргааг Яармагийн шинэ байр руу нүүлгэх төсвийг нийслэлийн төсвийн тодотголд суулгасан бөгөөд нийт 1.5 тэрбум төгрөгөөр нүүлгэхээр санхүүжилтийг тусгаад байгаа юм.

Түүнчлэн Яармаг дахь хотын захиргааны байрны барилгын ашиглалтын өмнөх захиргааны төсөвт тодотголоор 300 сая төгрөг суулгажээ. Он гарснаас хойш нийслэлийн төсөвт 2 ч удаа тодотгол хийгээд байгаа билээ.

Хотын захиргаа Хангарьд ордноос нүүсний дараа тус байранд Дээд шүүх орохоор засвар болон тавилгын тендерээ зарлаад байгаа аж. Тодруулбал, Дээд шүүх Хангарьд ордон руу нүүж ирэхдээ бэлтгэн тоног төхөөрөмж 1.1, тавилга худалдан авахад 2.1 тэрбум төгрөгийн тендер зарлажээ. Түүнчлэн байрны их засварын тендерийг 8.2 тэрбум төгрөгөөр зарласан байна.

Нийт 9774.7 ам.метр талбайтай 15 давхар бүхий “Хангарьд” ордны барилгад нийслэлийн 14 газар, агентлаг үйл ажиллагаа явуулдаг. Хангарьд ордныг анх дуудлага худалдаагаар зарна гэж байсан бөгөөд анхны үнийг 43 тэрбум 423 сая 400 мянган төгрөг хэмээн зарлаж байсан юм. Харин Дээд шүүх тус байрыг худалдаж авсан уу, авсан бол хэдээр авсан бэ гэдэг нь одоогор тодорхой биш байгаа юм.