Япон Улсаас Монгол Улсад суугаа Онц бөгөөд Бүрэн эрхт Элчин сайд М.Игавахараг хүлээн авч  уулзлаа

Монгол Улсын Тэргүүн шадар сайд бөгөөд Эдийн засаг, хөгжлийн сайд Л.Гантөмөр Япон Улсаас Монгол Улсад суугаа Онц бөгөөд Бүрэн эрхт Элчин сайд М.Игавахараг хүлээн авч  уулзлаа.

Уулзалтаар Монгол, Японы Эдийн засгийн түншлэлийн хэлэлцээрийн хэрэгжилтийг эрчимжүүлэх хүрээнд хамтран ажиллах, шаардлагатай тохиолдолд уг хэлэлцээрт нэмэлт өөрчлөлт оруулах асуудлаар харилцан санал, мэдээлэл солилцов. Мөн Япон Улсын Засгийн газрын санхүүжилтээр хэрэгжих боломжит зээл, тусламжийн төсөл, хөтөлбөрийн талаар санал солилцож, “Чингис хаан олон улсын нисэх онгоцны өргөтгөл” төслийг шинээр хэрэгжүүлэх саналыг тавьлаа. Монгол, Японы Төр, хувийн хэвшлийн 11 дүгээр зөвлөлдөх уулзалтыг ойрын хугацаанд хийх хүсэлтэй байгааг илэрхийлж, харилцан ажил хэрэгч хамтын ажиллагааг урагшлуулахаар тохиролцов.

ХБНГУ-аас Монгол Улсад суугаа Онц бөгөөд Бүрэн эрхт Элчин сайд Хэльмут Кулитцыг хүлээн авч уулзлаа

Монгол Улсын Тэргүүн Шадар сайд бөгөөд Эдийн засаг, хөгжлийн сайд Л.Гантөмөр ХБНГУ-аас Монгол Улсад суугаа Онц бөгөөд Бүрэн эрхт Элчин сайд Хэльмут Кулитц тэргүүтэй төлөөлөгчдийг хүлээн авч уулзав.

Уулзалтаар Тэргүүн Шадар сайд бөгөөд Эдийн засаг, хөгжлийн сайдын зүгээс Засгийн газраас баримталж ажиллах бодлого, тэр дундаа эрчим хүчний салбарын либералчлалын талаар дэлгэрэнгүй танилцуулж, мөн цаашид технологи шингэсэн, ногоон эдийн засгийг хөгжүүлэхэд Герман Улсын туршлагаас суралцах нь чухал болохыг тэмдэглэв. Энэ онд хоёр улсын хооронд дипломат харилцаа тогтоосны 50 жилийн ой тохиож байгаа төдийгүй Стратегийн түншлэлийн харилцаанд хүрснийг онцолж, талууд хоёр улсын худалдаа, хөрөнгө оруулалтын хамтын ажиллагааг өргөжүүлэхэд анхаарна гэдгээ илэрхийлэв. Түүнчлэн Германы зүгээс Засгийн газрын эрчим хүчний реформын арга хэмжээг дэмжиж ажиллахаа дурдлаа.