461 дүгээр ангид хоригдож байгаад нас барсан иргэнтэй холбоотой асуудлаар ХҮЭК-оос мэдээлэл хийлээ.
461 дүгээр хорих ангид хоригдож байгаад нас барсан 21 настай иргэн О эмнэлгийн байгууллагад хүргэгдсэн ч нас барсан харамсалтай хэрэг гарсан. Хоригдож байхдаа нас барсан иргэний эрх зөрчигдсөн, эсэхэд ХЭҮК хяналт шалгалт хийж байгаа болон хэргийн талаар мэдээлэл хийв.
Д.Сүжид: Хэрэг болсон даруйд холбогдох байгууллагуудаас мэдээлэл авсан. Одоо шалгах, хянах ажиллагааг хийж байна
ХЭҮК-ын дарга Д.Сүнжид: Юуны өмнө цагдан хорих 461 дүгээр ангид хоригдож байгаад долоодугаар сарын 23-ны өдөр Гуравдугаар эмнэлэгт хүргэгдэж ирээд нас барсан иргэний гэр бүл, төрөл төрөгсдөд ХЭҮК-ын өмнөөс гүн эмгэнэл илэрхийлье. ХЭҮК төрийн байгууллагууд чиг үүргээ хэрэгжүүлж байгаа эсэхэд хяналт тавих үүрэгтэй. Энэ хэрэг болсон даруйд чиг үүргийнхээ хүрээнд цагдаа, шүүхийн шийдвэр гүйцэтгэх байгууллага, хяналт тавьж байгаа прокурор, эмнэлэг, болон өмгөөлөгчтэй нь холбогдож тодорхой мэдээлэл авсан. Одоо шалгах, хянах ажиллагааг хийж байна. Ер нь ХЭҮК-оос эрүү шүүлт тулгах, хүнлэг бус харьцах, хүний нэр төрийг гутаан доромжлох зэргийн эсрэг хатуу байх байрь суурийг илэрхийлсээр ирсэн. Төрийн байгууллагын буруутай үйл ажиллагаанаас болж хүний амь нас хохирох ёсгүй. Зохих ёсоор хуулийн дагуу буруутай этгээдэд харицулага тооцох ёстой. Цаашид энэ үйл ажиллагааг холбогдох байгууллагууд тухай бүрд нь мэдээлэл хийж байхыг шаардана. Үүний мөрөөр хяналт тавиад буруутай этгээд нь хариуцлага тооцох болон дүгнэлтээс шалтгаалаад бид комиссын хуулиар заасан чиг үүргээ хэрэгжүүлж ажиллана.
Г.Нарантуяа: Эрүү шүүлт, хэрцгий, хүнлэг бус харьцаа, хүний нэр төрийг доромжлох зэрэг үйлдлүүдэд нь хуулийн байгууллагын ажилтнуудын боловсролтой холбоотой байна
ХЭҮК-ын гишүүн Г.Нарантуяа: Долоодугаар сарын 23-ны өдрөөс энэ мэдээлэл олон нийтэд цацагдаж, 24-ний өдрөөс ХЭҮК-ын шалгалтын үл ажиллагаа эхэлсэн. ХЭҮК-оос эрх бүхий албан тушаалтанд сануулсаар ирсэн зүйл бол эрүү шүүлтийн гэмт хэргийг хараат бусаар мөрдөн шалгах тогтолцоо Монгол Улсад байхгүй. Энэ хэргийг Авлигатай тэмцэх газар, Цагдаагийн ерөнхий газар Тагнуулын еранхий газар, зэрэг байгууллагууд тойргоор шалгаж байгаа нь үр дүнтэй тогтолцоо болж чадахгүй байна гэдгийг хэлсээр ирсэн. Ямар ч тохиолдолд эрүүл мэндийн байгууллага эмчлүүлэгч этгээдын хөдөлгөөнийг ямар нэгэн байдлаар хязгаарлах шаардлага үүссэн бол гав биш эмнэлгийн арга хэрэгсэл хэрэглэх ёстой. Энэ тохиолдолд гав хэрэглэсэн нь хүнлэг бус харьцаа гэж үзэх үндэслэлтэй гэж дүгнэж байна.
Дараагийн асуудал бол эрүү шүүлт, хэрцгий, хүнлэг бус харьцаа, хүний нэр төрийг доромжлох зэрэг үйлдлүүдэд нь хуулийн байгууллагын ажилтнуудын боловсролтой холбоотой байна.
Эмгэнэлтэй, олон нийтийг цочроосон үйл явдлыг мэдээлэхдээ хүний эмзэг мэдээлэл, ял шийтгэлийн талаар мэдээлэхгүй байх, мөн мэдээллийг тэнцвэртэй хүргэх талаар холбогдох байгууллагууд анхаарах шаардлагатай байна.
Г.Ууганбаатар: Амиа алдсан иргэн 00-д бие засаж байхдаа унаж, таталт өгсөн нь камерт бичигдсэн
ХЭҮК-ын Гомдол мэдээлэл шалгах хэлтсийн дарга Г. Ууганбаатар: Амиа алдсан иргэн долоодугаар сарын 22-ны өдөр 16.36 цаг орчим хорих өрөөний 00-д бие засаж байхдаа унаж, таталт өгсөн нь камерт бичигдсэн. Ингээд анхны тусламжийг тус хорих өрөөнд хамт хоригдож байсан иргэний зүгээс үзүүлсэн. Нэг минут орчмын дараа хорих ангийн алба хаагч анхны тусламжийг үргэлжлүүлэн хийж байгаа дүр зураг байна. 103-д дуудлага өгөөд 17.25 цагт яаралтай тусламжийн эмч хорих байранд ирж эмнэлгийн тусламж үзүүлсэн. Ингээд 18.23 цагт Улсын гуравдугаар төв эмнэлэгт хүргэсэн байна. Ингээд 23.37 цаг хүртэл эмчилгээ хийгээд, тухайн иргэн амь насаа алдсан талаар урьдчилсан байдлаар тогтоогдсон. Эмчилгээний туршид хянаж байсан Шүүхийн шийдвэр гүйцэтгэх байгууллагын хоёр алба хаагч байгаа. Тухайн алба хаагчидтай хяналт шалгалтыг хүрээнд уулзсан. 50 минутын турш гар хөлөнд нь гав хэрэглэсэн гэдэг тайлбарыг өгсөн. Эмнэлгийн байгууллага болон бусад эх сурвалжаас тодруулж энэ асуудлыг бататгах шаардлагатай. Шүүхийн шийдвэр гүйцэтгэх байгууллагаас тодорхой хугацаанд гэв хэрэглэсэн гэдгээ хүлээн зөвшөөрсөн. Тухайн иргэн цагдан хоригдож байхдаа хүлээж авсан тэмдэглэл болон эргэлт, уулзалт, эмчилгээний бүртгэл, хамт хоригдож байсан иргэдээс авсан мэдээлэл зэрэгт тулгуурлан шалгах ажиллагааг үргэлжлүүлж байна.
