"Монполимет" компанийн үүсгэн байгуулагч Ц.Гарамжавд эрүүгийн хэрэг үүсгэн яллагдагчаар татсан талаар тус компанийн өмгөөлөгч Г.Нацагдорж мэдээлэл хийлээ.

Тэрээр, "Иргэн Ц.Гарамжавд эрүүгийн хэрэг үүсгэж яллагдагчаар татсан асуудлаар прокурорын байгууллагад гомдол гаргасан. Энэ тогтоол хоёр үндэслэлээр хуульд нийцэхгүй гэж үзэж байна. Нэгдүгээрт,  2014 оны үйл явдалд холбогдуулаад 2024 онд эрүүгийн хэрэг үүсгэж байгаа нь хөөн хэлэлцэх хугацааг зөрчиж байна.

Хоёрт, иргэн Ц.Гарамжав нь хатгагчаар оролцсон байна. Гэмт хэрэг үйлдсэн этгээдээ олоогүй байж хатгагч гэж эрүүгийн хэрэг үүсгэж байгаа нь үндэслэлгүй байна. Нийслэлийн прокуророос энэ талаар тодруулахад “Бид холбогдох нотлох баримтыг цуглуулж байгаа. Үүний үндсэн дээр хэргийг хаах, эсэхийг шийдвэрлэнэ" гэсэн хариуг бидэнд өгсөн.

Тиймээс манай талаас энэ асуудлаар дахин дээд шатны прокурорт хандаж гомдол гаргасан. Цуглуулсан баримтдаа тулгуурлаад эрүүгийн хэрэг үүсгэх ёстой. Гэтэл одоо ямар ч баримтгүй байж эрүүгийн хэрэг үүсгээд байна. Иймээс улсын Ерөнхий прокурорт гомдол гаргасан.

Мөн эрүүгийн хэрэг үүсгэж яллагдагчаар татахдаа хөрөнгө битүүмжилсэн. Хөрөнгө битүүмжлэх тухай ойлголт бол Эрүүгийн хэрэг хянан шийдвэрлэх тухай хуульд байгаа. Үүнтэй маргахгүй. Гэхдээ хөрөнгийг битүүмжлэх үндсэн хоёр нөхцөл бий. Нэг нь хохирол нөхөн төлүүлэх зорилготой. Гэтэл прокурорын эрүүгийн хэрэг үүсгэсэн тогтоол, хөрөнгө өмчилсөн тогтоол хоёрын аль дээр нь ч хохирлын хэмжээг огт заагаагүй. Хохирлын хэмжээ заагаагүй хэр нь хохиролд зориулж хөрөнгө битүүмжлээд байгаа нь үндэслэлгүй байна.

"Монполимет" компани 65 сая ам.доллартой тэнцэх хэмжээний буюу 126 тэрбум төгрөг банкнаас зээлсэн. Буцаагаад 260 гаруй тэрбум төгрөг болгон төлсөн. Ингээд зээлж авсан мөнгөө бүхэлд нь төлөөд иргэний эрх зүйн харилцаа дуусчхаад байхад хохиролтой байна гэж үзээд хөрөнгө битүүмжлээд байгаа юм. Ц.Гарамжав гэдэг хүнтэй огт хамааралтгүй Тосонгийн уурхайн үйл ажиллагааг хааж, дарамт учруулах замаар хэрэг хүлээлгэх гэсэн оролдлого гэж үзэж байна.

Тосонгийн уурхайг хааснаас шалтгаалаад 1300 гаруй хүн ажилгүй болчхоод байна. Тосонгийн уурхайг хааснаас болоод сул зогсолт хийгээд байна. Энэ сул зогсолтын цалинг компаниас олгож байгаа. Энэ мэт асуудлаас болж одоогийн байдлаар компанид нэг тэрбум гаруй төгрөгийн хохирол учраад байна. 

Иргэн Ц.Гарамжавыг хатгагчаар болон мөнгө угаасан хэрэгт буруутгасан. Одоо компанийн болон түүнтэй хамаарал бүхий этгээдийн бүх бичиг баримыг хураагаад авчихсан. Бичиг баримтыг нь хурааж авчхаад татварын шалгалтууд оруулан. Татварын асуудал бол АТГ-ын шалгадаг хэрэг огт биш. Татвартай холбоотой асуудлыг цагдаагийн байгууллага шалгах ёстой. Одоо Ц.Гарамжавыг татварын асуудлаар шалгаад эхэлсэн. Энэ нь цаашлаад өөр бусад ямар ч хэрэг үүсгэх, тохох боломжтой гэж хардаж байна" гэлээ.

Хэргийг эргэн сануулахад, өнгөрсөн тавдугаар сарын 28-нд "Монполимет" группийн үүсгэн байгуулагч Ц.Гарамжавыг Хөгжлийн банкнаас авсан зээлийн асуудлаар хэрэг үүсгэн яллагдагчаар татсан билээ. Ингэхдээ түүнийг АТГ-аас 48 цагийн хугацаатай хойшлуулшгүйгээр баривчилж, тавдугаар сарын 30-нд прокурорын саналаар сулласан юм. Мөн Нийслэлийн прокурорын газраас "Монполимет" группэд хамаардаг зургаан компанийн харилцах дансыг хааж, Төв аймгийн Заамар суманд байрлах Тосон үйлдвэрийн үйл ажиллагааг зогсоосон билээ.