Зариг.мн сайтын эрхлэгч, Сэтгүүлч Н.Өнөрцэцэгт шүүхээс 4 жил 9 сарын хорих ял оноосон. Тодруулбал, Н.Өнөрцэцэгт холбогдох хэргийн шүүх хуралдаан Сүхбаатар дүүргийн эрүүгийн хэргийн анхан шатны шүүхэд хоёр хоног үргэлжилж шийдвэр гаргасан билээ.

Түүнийг төрийн нууц хадгалсан, бусдын алдар хүндэд халдсан, татвараас зайлс хийсэн гэсэн таван зүйл ангиар буруутган ял оноосон юм. Тэгвэл Н.Өнөрцэцэгийн ар гэрийнхэн төрийн гурван өндөрлөгт хандаж байгаа талаараа мэдээлэл хийлээ.

Одоогоор шүүхийн шийдвэр албажиж ирээгүй байгаа бөгөөд ар гэрийнхэн нь давж заалдах шатны шүүхэд хандана гэдгээ хэллээ.

Н.Өнөрцэцэгийн эгч “Манай дүүг таван хэргээр шалгасан байдаг юм. Хоёр нь татвартай холботой. Татвартай холбоотой хэрэгт хорих зүйл анги байдаггүй юм билээ. Дараагийн хоёр хэрэг нь алдар нэр хүндэд халдсан гэх хэрэг. Тав дахь нь төрийн нууц гээд байгаа. Н.Өнөрцэцэг нь 20 гаруй ажилчинтай, бүгдийнх нь ширээнд ямар бичиг баримт байгааг мэдэхгүй. Төрийн нууцтай холбоотой бичиг нь манай дүү Н.Өнөрцэцэгийнх биш, гэтэл хамаатуулж шууд ялласанд гомдолтой байна. Бусдыг шантаажилсан, үндэслэлгүй хөрөнгөжсөн зүйл анги байхгүй.

Төрийн нууцтай холбоотой гэдэг хэрэг нь манай дүүд хамаарахгүй.  Энэ хэргийг шалгах юм бол нотлогдох л юм билээ.

Өмгөөлөгчгүй шүүх хурал хийгээд яллаж болох юмуу. Давж заалдах шүүх хурал дээр нь үнэн шударгаар шийдэж өгөөсэй гэж хүсч байна. Шүүхийн шийдвэр энгийн иргэдэд л хатуу байна, албан тушаалтан, сайд дарга нарт хамаагүйюм байна. Нүүрсний хулгай, Хөгжлийн банкны хулгай, Боловсролын зээлийн сан,  ногоон автобусны хулгай яасан бэ.

Хүүхдийг хэрцгийгээр хөнөөсөн ялтны мэдээлэл гаргасан хүн яагаад яллагдах ёстой юм. Төрийн нууцтай холбоотой мэдээлэл нь машинаас нь олдсон. Ажилчных нь машинд хоёр долоо хоног явсан байдаг, үүнийг шалгах ёстой байтал шалгаагүй. Өөрт нь хамааралгүй асуудлаар л шалгаж, ялласан” гэлээ.