“Дэлхийн Монгол” булангийнхаа энэ удаагийн дугаарт “Рио Тинто” группийн хүдрийн биетийн бүтээмж сайжруулалт, технологийн менежер Жамъянбаатарын ЯНСАН-г урьж ярилцлаа. Тэрээр уул уурхай, геологийн салбарт тасралтгүй 15 жил ажилласан, тэр дундаа дэлхийн томоохон уурхайнуудад геологийн ажлыг технологитой уялдуулан оновчтой шийдвэр гаргалтыг хийж ирсэн туршлагатай нэгэн юм. Орд бүр өөрийн гэсэн онцлогтой байдаг. Харин түүнийг геологийн хувьд технологийн ямар шийдлээр мэдээлэл цуглуулж, цуглуулсан мэдээллээ боловсруулж, уурхайн аюулгүй байдал, санхүүгийн болон бусад эрсдэлээс сэргийлэх технологийн шийдлийг боловсруулах ажил хийдэг. Нэг үгээр хэлбэл, Ж.Янсан одоо "Рио Тинто"-гийн Зэсийн группийн төсөл болон уурхайнуудын технологийн шийдлүүдийг олох ажлыг хийж байгаа аж.

-Та Монголдоо их сургууль төгссөн юм байна. Таны ажил, амьдралын гараа хэрхэн эхэлж байсан талаар ярилцлагаа эхэлье?

-Би эхнэр гурван хүүхдийн хамт Австрали улсад ажиллаж, амьдардаг. Одоогоор "Рио Тинто"-гийн Зэсийн группт Геологийн бүтээмж сайжруулалт болон технологийн хэлтсийн менежер гэдэг албан тушаалтай ажиллаж байна. Бүтээмж бол технологитой салшгүй холбоотой. Бид технологийг ашиглаж бүтээмжийг нэмэгдүүлдэг. Геологич хүний бүтээмж технологи ашигласнаар нэмэгдэж, одоогийн хүчин чадлаараа илүүг бүтээх үндэс болдог. Үүнтэй зэрэгцээд тухайн хүний хөгжилд үнэтэй хувь нэмэр болдог.

Би багаасаа дэлхий хэрхэн оршин тогтнодог, зүй тогтлыг их сонирхдог байсан. Мөн технологи сонирхдог хүүхэд байлаа. Манай аав геофизикч хүн байсан. Тиймээс аавынхаа мэргэжилтэй ойр геологич эсвэл программист болохоор шийдсэн. Ингээд 2002 онд ШУТИС-д Геологийн зураглалын ангид ороод хувь заяагаа геологийн салбартай холбоод 20 орчим жил болж байна даа.