2024-2025 оны хичээлийн жилийн цэцэрлэгийн бүртгэл наймдугаар сарын 1-ээс эхэлнэ. Тэгвэл бэлтгэл ажлын талаар Нийслэлийн Боловсролын ерөнхий газрын дарга Т.Ням-Очироос тодрууллаа.
-Энэ жилийн хувьд төрийн өмчийн болон төрийн өмчийн бус, нийт хэчнээн цэцэрлэгт хэдэн хүүхэд хамрагдах вэ?
-2023-2024 оны хичээлийн жилд улсын хэмжээнд 1410 цэцэрлэг үйл ажиллагаа явуулж, 274 мянга гаруй хүүхэд хүмүүжсэн. 2024-2025 оны хичээлийн жилд 290 мянга гаруй хүүхдэд сургуулийн өмнөх боловсролд хамрагдах хэрэгцээ үүснэ. Гэвч хүүхдээ цэцэрлэгт өгөх, эсэх нь эцэг эхийн хүсэлтэд тулгуурладаг учраас хэдэн хувь нь хүүхдээ цэцэрлэгт хамруулах нь бүртгэлийн дараа тодорхой болно. 2022-2023 оны хичээлийн жилээс эхлээд хүсэлт гаргасан хүүхэд бүрийг цэцэрлэгт хамруулах Засгийн газрын шийдвэр гарч, тухайн үед нийслэлд төвлөрч ажилласан. Нийслэлийн хэмжээнд цэцэрлэгт хамрагдаж чадахгүй байсан 35 мянга гаруй хүүхдийг цэцэрлэгт хамруулах бодлогын арга хэмжээг авч хэрэгжүүлсэнээрээ хамран сургалтыг 92.9 хувьд хүргэсэн. Цэцэрлэгийн гадна 8000 орчим хүүхэд л үлдсэн. Өөрөөр хэлбэл, тухайн 8000 орчим хүүхдийн эцэг эх нь хүүхдээ цэцэрлэгт хамруулах хүсэлт өгөөгүй гэсэн үг.
Энэ хичээлийн жилд бид өмнөх прогноз дээрээ тулгуурлан бэлтгэл ажлыг хангаж байна.
-Хамран сургах тойргийн талаар?
-Шинээр батлагдсан боловсролын тухай хуульд аргачлалыг Боловсролын ерөнхий газар баталгаажуулахаар заасан. Боловсролын ерөнхий газар аргачлалаа баталсан. Тухайн аргачлалын хүрээнд Нийслэлийн Боловсролын ерөнхий газар болон аймгийн боловсрол, шинжлэх ухааны газар хамран сургах тойргоо тогтоосон. Үүний дагуу бүртгэлийг явуулна.
-Цэцэрлэгийн багшийн хувьд ажиллах хүч хангалттай байгаа юу?
-Өнгөрсөн хичээлийн жилийн хувьд СӨБ-ын мэргэжлийн багшийн хангалт 92 хувьтай байсан. Сүүлийн жилүүдэд бид хүүхэд бүрийг цэцэрлэгт хамруулах бодлого хэрэгжсэнээр бүлгийн тоо их нэмэгдсэн. Гурав, дөрөвдүгээр курсийн оюутнуудыг туслах багшаар авч ажиллуулсан. 700 гаруй оюутан болон бүрэн дунд боловсролтой залуус цэцэрлэгт ажилласантай холбоотой мэргэжлийн багшийн эрэлт бага зэрэг буурсан үзүүлэлттэй байсан. Бид сүүлийн хоёр жил СӨБ-ын боловсон хүчнийг тогтворжуулж, анхаарч ажилласан учраас энэ жил багшийн орон тооны дутагдал бага байх болов уу гэсэн хүлээлттэй байна.
-Энэ жилийн хувьд цэцэрлэгийн бүртгэлийг хэдэн үе шаттай зохион байгуулах вэ?
-2022-2023 оны хичээлийн жилд гурван үе шаттай, 2023-2024 оны хичээлийн жилд хоёр үе шаттай зохион байгуулсан. Өмнө нь оочир дараалал үүсгээд амжсаныг нь авч, амжаагүйг нь орхидог байсан бол одоо хүсэлт гаргасан хүүхэд нэг бүрийг цэцэрлэгт хамруулах бодлого хэрэгжүүлж байна. Хоцорсон, түр оршин суух хаягтай хүүхдүүдийг бид үе шаттай бүртгэж байсан. Ингээд харьцангуй хоёр жил тогтворжоод явчихсан, бүртгэл цахимжсан учраас ийм асуудал үүсэхгүй гэж үзээд энэ жил нэг үе шаттайгаар бүртгэж, хуваарилалт хийнэ.
-Хүүхэд бүрийг цэцэрлэгт хамруулснаар байр савны хомстол үүсэх үү?
-Өнгөрсөн хичээлийн жилд 100 байрыг түрээсэлж, цэцэрлэгийн зориулалтаар ашигласан. Үүнээс есийг нь цуцалсан. Энэ жил нэмэлтээр дахин 10 гаруй байршилд барилга түрээслэхээр судалгаа хийж байна.
Дараах 12 байршилд шинээр цэцэрлэгийн зориулалттай байр түрээслэх хэрэгцээ үүсээд байна. Үүнд:
-БЗД-ийн 17, 26 36, 31, 38, 39, 42 дугаар хороо
-ХУД-ийн 8, 18, 21, 23 дугаар хороонд нийт 2913 хүүхдийг хамрууах 10 барилга байгууламж түрээслэнэ. Ажлын хэсэг 2024 оны долоодугаар сарын 18-ны өдрөөс эхлэн эдгээр байршлуудад ажиллана.
