Монгол Улсын Ерөнхий сайд Л.Оюун-Эрдэнэ Монгол Улсын Ерөнхийлөгчид шинэ Засгийн газрын гишүүдийг өнөө өглөө танилцууллаа.

Ерөнхий сайд Л.Оюун-Эрдэнэ: Эрхэм Монгол Улсын Ерөнхийлөгч, төрийн тэргүүн тантай зөвшилцсөний дагуу Үндсэн хуульд заагдсан бүрэн эрхийнхээ хүрээнд улс төрийн намуудтай зөвшилцөж, хамтарсан Засгийн газар байгуулж ажиллах нь зүйтэй гэж үзсэн. Ингээд улс төрийн намууд сонгуулиас хойш зөвшилцөөд өнөөдрийн хамтарсан Засгийн газрыг Монгол Улсын хөгжлийн тулгамдсан асуудлыг хурдтай шийдвэрлэх гэдэг үндсэн зарчим дээр тохиролцоод байна. Хамтарсан Засгийн газар байгуулахад парламентад хамгийн олон суудал авсан гурван нам, мөн Монгол Улсын Үндсэн хуульд өөрчлөлт оруулж, холимог тогтолцоонд шилжихэд улс төрийн шийдвэр гаргасан гурван нам хамтарсан Засгийн газар байгуулах санамж бичигт гарын үсэг зурсан. Засгийн газар байгуулагдаад 30 хоногийн дотор Засгийн газрын үйл ажиллагааны хамтарсан хөтөлбөрийг гаргана.  

Монгол Улсын Ерөнхийлөгч У.Хүрэлсүх: Улс төрийн эв нэгдэлтэй, улс эх орныхоо төлөө ажиллах ёстой. Парламентынхаа төлөөллийг нэмэгдүүлье, ардчиллаа улам баталгаажуулъя, парламентын засаглалаа боловсронгуй болгоё гэж олон жил ярьсан. Үүнийг төрийн тэргүүн дэмжсэн. Өнгөрсөн хугацаанд би Монгол Улсын Засгийн газар, улс төрийн намуудад янз янзын асуудал ярьж байгаагүй. Та бүхэн бүгд мэдэж байгаа. Өнөөдрөөс эхэлж сонгогдвол та бүхний гарт Монгол Улсын хувь заяа ирж байгаа. Хариуцлагаас зугтах ямар ч эрхгүй болсон, та нар. Хамтдаа зүтгэнэ, хамтдаа хариуцлагаа үүрнэ. Энэ Монгол Улсын хувь заяа та нарын гарт ирж байна. Хяналтгүй амьдрана гэж байхгүй. Улс төрийн намууд хяналтаа тавина, парламент хяналтаа тавина, Ерөнхийлөгч хяналтаа тавина. Та нар хамгийн гол нь хариуцлагатай ажиллах хэрэгтэй. Сайн сайхан бүх зүйлийн чинь Ерөнхийлөгч дэмжинэ. Буруу зүйл хийвэл би анхнаасаа хатуу хандана шүү. Үүнийг анхныхаа уулзалт дээр хэлье. Төрийн сайд гэдэг бол тоглоомын ажил биш шүү. Хэн нэгэн хүний хүсэж мөрөөдөөд байдаг, биелдэг ажил биш. Та бүхэн төрийн тамга атгана. Монгол төрийн түшээгээс гадна, төрийн сайд хийнэ. Маш хариуцлагатай ажил. Энэ парламентыг хариуцлагын парламент байгаасай гэж бодож байгаа. Засгийн газар ч мөн адил.