2024.07.10-ны 06.00 цаг: Ерөнхий сайд УИХ-д сайд нараа танилцуулав
Монгол Улсын Ерөнхий сайд Л.Оюун-Эрдэнэ танхимдаа ажиллах сайд нараа Ерөнхийлөгчтэй зөвшилцсөний дараа УИХ-ын чуулганд танилцууллаа.
Шинээр бүрдэж буй Засгийн газрын гишүүдийг дэмжиж байгаагаа илэрхийлж УИХ-ын таван гишүүн үг хэлж, нэг гишүүн асуулт асуулаа.
Гишүүд үг хэлсний дараа Засгийн газрын сайд нарын танилцуулгыг УИХ сонссонд тооцож, Монгол Улсын 33 дахь Ерөнхий сайд Л.Оюун-Эрдэнийн тэргүүлэх Хамтарсан Засгийн газрын танхим бүрдлээ.
Одоо үргэлжлүүлэн шинээр томилогдож буй сайд нар тангараг өргөж, үүрэгт ажилдаа орно.
Шинэ Засгийн газар 30 хоногийн дотор 2024-2028 онд хэрэгжүүлэх үйл ажиллагааны мөрийн хөтөлбөрөө боловсруулж, УИХ-д танилцуулах хуулийн хугацаатай юм.
• • •
2024.07.10-ны 01.30 цаг: Ерөнхий сайд танхимдаа ажиллах сайд нараа МАН-ын Удирдах зөвлөлд танилцуулж байна
Монгол Улсын Ерөнхий сайд Л.Оюун-Эрдэнэ танхимдаа ажиллах сайд нараа МАН-ын Удирдах зөвлөлд танилцуулж байна. Ерөнхий сайд Л.Оюун-Эрдэнэ УИХ-д суудалтай АН, ХҮН намд хамтарсан засаг байгуулах санал хүргүүлж, тус намууд хамтрах шийдвэр гаргасан. Энэ хамтралын дагуу МАН 12, АН 8, ХҮН нам хоёр сайдын суудал авахаар тохирчээ. Нийт 22 сайдтай, 16 яамтай ажиллана.
Монгол Улсын Шадар сайд С.Амарсайхан
Зам тээврийн сайдаар Б.Дэлгэрсайхан
Аялал жуулчлал, соёл, спорт залуучуудын сайдаар Ч.Номин
Гадаад харилцааны сайдаар Б.Батцэцэг
Сангийн сайдаар Б.Жавхлан
Эрчим хүчний сайдаар Б.Чойжилсүрэн
Батлан хамгаалахын сайд С.Бямбацогт
Гэр бүл, нийгмийн хамгааллын сайдаар Л.Энх-Амгалан
Засгийн газрын Хэрэг эрхлэх газрын даргаар Н.Учрал
Хүнс, хөдөө аж ахуй хөнгөн үйлдвэрийн сайдаар Ж.Энхбаяр
Монгол Улсын сайд, Боомтын сэргэлтийн Үндэсний хорооны даргаар Б.Тулга
Эрүүл мэндийн сайд Т.Мөнхсайхан
Монгол Улсын сайд, Хяналт үнэлгээний үндэсний хорооны дарга Э.Одбаяр
Аж үйлдвэр Эрдэс баялгийн сайд Ц.Туваан
Хот байгуулалт орон сууцжуулалтын сайд Ж.Батсуурь
Монгол Улсын сайд, 20 минутын хот төслийн Үндэсний хорооны даргаар Р.Эрдэнэбүрэн
Хууль зүй, дотоод хэргийн сайдаар О.Алтангэрэл
Байгаль орчин, уур амьсгалын өөрчлөлтийн сайдаар С.Одонтуяа
Цахим хөгжил, инноваци, харилцаа холбооны сайдаар Ц.Баатархүү
МАН-ын Удирдах зөвлөлөөс дэмжсэн саналыг Ерөнхий сайд Л.Оюун-Эрдэнэ Монгол Улсын Ерөнхийлөгч У.Хүрэлсүхтэй зөвшилцөхөөр хүргүүлж, УИХ-д сайд нараа танилцуулах юм. УИХ-д танилцуулсны дараа шинэ сайд нар тангараг өргөж, бүрэн эрх нь хэрэгжинэ. Сайдын тангарагийг хүн тус бүр уншихгүйгээр нэгтгэж уншихаар болсон.
