УИХ-ын ес дэх удаагийн сонгуулийн үр дүнгээр сонгогдсон парламентын анхдугаар чуулган эхэллээ. Шинэ гишүүд тангаргаа өргөж, эрхээ баталгаажууллаа. УИХ-ын анхдугаар чуулганыг Монгол Улсын Ерөнхийлөгч У.Хүрэлсүх нээж үг хэллээ.
Монгол Улсын Ерөнхийлөгч У.Хүрэлсүх: УИХ-ын ес дэх удаагийн сонгуульд манай ард иргэд ардчилсан монгол орныхоо бүрэн эрхт эзэн нь байж өмнөхөөсөө илүү өргөн оролцоотой байж сонгох, сонгогдох эрхээ эдэллээ. Засгийн бүх эрх ард түмний мэдэлд байх Үндсэн хуулиар олгогдсон эрхээ баталгаажуулан төрийн эрх барих дээд байгууллага төлөөлөгчдөө сонгох сонгуульд идэвхтэй оролцсон нийт иргэд, сонгогчдодоо болон хилийн чанадад суугаа монголчууддаа гүн талархал илэрхийлж, та бүхний өмнөөс талархал дэвшүүлж байна.
Мөн ард иргэдийнхээ сонгох сонгогдох эрх, нөхцөл боломжийг хангаж, хуулийн хүрээнд амжилттай сайн ажилласан СЕХ, сонгуулийн бүх шатны хороодод ажилласан 40 гаруй мянган төрийн албан хаагч болон сонгуулийн мэдээ мэдээллийг түргэн шуурхай, ил тод, цаг алдалгүй түгээн ажилласан гадаад, дотоодын хэвлэл мэдээллийн ажилтнуудад гүн талархал илэрхийлье.
Эрхэм хүндэт төрийн түшээд ээ,
Өргөн түмнийхээ итгэлийг хүлээж, өндөр төрийнхөө түшээдээр сонгогдсон та бүхэн Үндсэн хууль болон бусад хуульд заасны дагуу төр засгаа эмхлэн байгуулж, түмэн олныхоо төлөөх эрхэм үйл хэрэгтээ цаг алдалгүй шамдан ажиллах шаардлагатай байна. Энэ мөчөөс эхлэн төрийн түшээд та бүхэн авлига, ашиг сонирхлоос ангид байж нийт ард иргэд, улсын ашиг сонирхлыг эрхэмлэн дээдэлж, төр түмэндээ өргөсөн тангарагтаа үнэнч байж амласан амлалтаа биелүүлэх цаг хугацаа ийнхүү эхэлж байгааг цохон тэмдэглэж байна.
УИХ-ын энэхүү эрхэм танхимд хувь хүний хэрүүл маргаан биш улс орны хөгжил дэвшлийн төлөөх бодлогын мэтгэлзээн өрнөж, хувийн явцуу эрх ашиг биш улс орны язгуур эрх ашгийн төлөөх бодлогыг хэлэлцүүлдэг, дүгнэдэг байх учиртай. Үүнийг ард түмэн ч та бүхнээс хатуу шаардах болно.
УИХ-ын гишүүний бүрэн эрх албан тушаалын уг сурвалж нь ард түмнээс эхтэй гэдгийг та бүхэн ямагт санаж яваарай. Парламент бол ард түмний хураангуй. Та бүхэн бол ард түмний төлөөлөл. Төр засаг, түмэн олныг холбох гүүр юм шүү гэдгийг огт мартаж болохгүй.
Хүн нэрээ, тогос өдөө гэж ардын сайхан үг байдаг. УИХ-ын гишүүн гэсэн энэхүү эрхэм хүндэтээ нэр хүндийг та бүхэн нэр төртэй, өндөрт өргөн хариуцлагатай авч явахыг хүсэж байна. Өнгөрсөн дөрвөн жилийн хугацаанд хүн төрөлхтөн дэлхий нийтээрээ цар тахал, геополитикийн зөрчил мөргөлдөөн гээд амаргүй цаг хугацаа үеийг бид хамтдаа тууллаа. Монголчууд биднээс үл хамаарах хүндрэл бэрхшээл улс орны эдийн засаг, ард түмний амьдрал ахуйд ч хүндээр нөлөөлж байсан. Хэдийгээр нөхцөл байдал амаргүй байсан ч гэсэн манай төр засаг ард түмэн, баялаг бүтээгчтэйгээ хамтран энэхүү хүнд үеийг хохирол багатай даван туулж, энэ оны эхний улирлын байдлаар улсынхаа эдийн засгийг 7.8 хувиар өсгөж чадсан байна.
Шинээр бүрдэж буй УИХ, Засгийн газар энэхүү эдийн засгийн өсөлтийг улам баталгаажуулж, үр шимийг нь өндөрт хүргэж, монгол хүн бүрийн ажил, амьдралд бодит үр өгөөж өгсөн эдийн засгийн бодлогыг нэн тэргүүнд хэрэгжүүлэх шаардлагатай байна.
Монгол хүн эх орон, газар нутагтаа эзэн байж байгалийн баялгийнхаа үр шимийг адил тэгш хүртэх учиртай. Монгол хүн, монголын ард түмэн эх орон, газар нутгаа хэзээ ч бусдад алдах ёсгүй. Эх орондоо эзэн байна гэдэг бол байгалийн баялагтаа эзэн байна гэсэн үг. Баялагтаа эзэн монголоороо төр засаг, түмэн олноороо бид хамтран тэмцэх, зүтгэх хэрэгтэй.
УИХ Үндсэн хуулиар эрхтэй Үндэсний баялгийн сангийн тухай хуулийг баталж чадсан нь байгалийн баялгаа төр ард түмнийхээ мэдэлд байлгаж, үр шимийг нь иргэн бүр тэгш хүртэх эрх зүйн шинэчлэл, тогтолцооны өөрчлөлтийн эхлэлийг тавьж чадлаа. Энэхүү баялгийн сангийн үр өгөөжийг нэн тэргүүнд ард иргэдийн боловсрол, эрүүл мэнд, орон байрыг шийдэх, үндэсний үйлдвэрлэлийг дэмжихэд чиглүүлэх учиртай гэж үзэж байна.
Монгол Улсын Ерөнхийлөгчийн үзэл санаа, үйл хэрэгтээ ямагт баримталж, ямагт сэтгэл чилээдэг улс үндэстний оршин тогтохуйн тулгуур гурван үнэт зүйл байдаг юм. Энэ бол Монгол Улсын тусгаар тогтнол, манай улсын аюулгүй байдал, манай ард түмний эв нэгдэл. Эрхэм түшээд та бүхэн ч гэсэн энэхүү үнэт гурван зүйлийг төрийн үйл хэргийг шийдэхдээ цаг ямарт санаж, эрхэмлэн дээдэлж, чандлан баримталж, нүдний цөцгий мэт хайрлаж, хамгаалж явах учиртай юм шүү.
Монгол Улсын Ерөнхийлөгч нийгэмд шударга тогтоохын төлөө хүн засагладаггүй, хууль засагладаг ардчилсан шударга төрийг жинхэнэ утгаар нь байгуулахын төлөө хичээн зүтгэн ажиллана гэдгээ ард түмэндээ хэлснийг та бүхэн мэдэж байгаа. Нийгэмд шударга ёсыг тогтоох нь УИХ, Засгийн газрын үндсэн чиглэл, ард иргэдийн итгэл найдвар, та бүхний хүлээх үүрэг даалгавар байх учиртай. Нийгэмд шударга ёс тогтоох үндсэн суурь нь хүн бүр хуулийн өмнө тэгш эрхтэй байж хууль ёс хүн бүрт тэгш үйлчлэх явдал. Төрд зүтгэж буй хэн боловч төгс сайн мэдлэггүй ч төгөлдөр сайн ёс суртахуунтай байх ёстой. Ард түмний төлөөлөл болсон та бүхэн ёс зүйн дээд манлайллыг ямагт үзүүлж байх ёстой гэдгийг цохон тэмдэглэж байна.
Ард иргэдийнхээ халуун итгэл, их хүлээлт дунд парламентын гишүүнээр сонгогдсон та бүхэн хүний ёсыг зөрчих, ёс зүйн алдаа гаргаж, өргөсөн тангаргаасаа няцвал ард иргэдээсээ уучлал гуйн нэн даруй өөрийн хүсэлтээр чөлөөлөгдөх ёстойг энэ өдөр анхааруулан хэлэхийг хүсэж байна.
Сонгуулийн үеийнх шиг намчирхан талцаж, хий хоосон улстөржиж хийрхэхгүйгээр эвийг эрхэмлэн зөвийг дэмжин, эвлэн нийлж эх орон ард түмнийхээ төлөө итгэл дааж, сэтгэл гаргаж хичээн зүтгэвэл зохилтой. Иймд энэ удаагийн УИХ аливаа асуудлыг хэлэлцэн шийдвэрлэхдээ монгол төрийн бодлогын залгамж чанарыг сайжруулан хадгалан, ард түмнийхээ санал бодлыг сайтар судалж, шинжлэх ухаанчаар асуудалд хандаж, хэлсэн үгэндээ эзэн болж эв эе, эвлэрэл зохицлыг эрхэмлэн бие биедээ хүндэтгэлтэй хандаж, уян хатан байж, уур уцаараар бус ухаан бодлоор асуудалд хандаж, шийдвэр гаргаж байхыг онцгойлон анхаарах ёстой.
Монгол төрийн эрхэм түшээд та бүхэн үндэсний язгуур эрх ашгийг дээдлэн сахиж, эзэн Чингис хааны сургаалийг даган мөрдөж, ард түмний эв нэгдлийг сахин бататгаж, эв эеээ хичээн эх орныхоо хөгжил дэвшил, монголын ирээдүйн сайн сайхны төлөө хичээн зүтгэх ёстой.
Бид нэг монгол, нэг гэр бүл, нэг ард түмэн гэдгээ гүнээ ухамсарлаж, хүсэл сонирхол, үнэт зүйлээрээ нэгдэн нийлж, хотол түмнээрээ сэтгэлээ түвшитгэн итгэлээ бэхэлж, эвээ зангидан эх орныхоо төлөө хамтдаа хүчин зүтгэцгээе.
Төр төвшин, шашин тунгалаг, дэлхий амгалан байх болтугай. Мөнх тэнгэрийн хүчин дор Монгол Улс мандан бадрах болтугай.
