Манай улсад Стартап буюу Гарааны бизнес гэх ойлголт үүсээд өдгөө хэдхэн жилийн нүүрийг үзэж байна. Монгол улсад жил бүр олон арван гарааны бизнесүүд үүд хаалгаа нээж бас барьж байна. Иймд эдийн засгаа солонгоруулж, инновацыг дэмжихийн тулд стартапуудыг анхнаас нь төрийн болон хувийн хэвшлүүд стратегийн түвшинд бодитоор дэмжих хэрэгцээ шаардлага үүсээд буй.
Тэгвэл үндэсний тэргүүлэгч MCS Group-ийн технологи, инновац хариуцсан TechPack Group нь Мэдээлэл Технологийн Үндэсний Парктай хамтран 300 сая төгрөгийн шагналын сантай "Startup Challenge Mongolia" тэмцээнийг технологийн салбараа түүчээлэн анх удаа улс орон даяар зохион байгуулжээ.
Уг тэмцээн нь өнгөрсөн 5 сард "Дэлхийд өрсөлдөх технологийн эрэлд" уриатай зарлагдаж Монголын өнцөг булан бүрээс 97 стартапууд нэг сарын турш, таван үе шаттайгаар өрсөлдөн ялагчаар “E-Geree” гэрээний систем тодорсон юм. Тэд одоо 7 сарын 9-нд болох Startup World Cup Central Asia-д улсаа төлөөлөн Төв Азийн 20н гарааны бизнестэй өрсөлдөх бөгөөд уг тэмцээний ялагч баг нь бүс нутгаа төлөөлөн дэлхийн аваргад өрсөлдөх юм.
Үндэсний ялагч E-Geree нь блокчейнд суурилсан цахим гэрээний систем бөгөөд Засгийн газар, бизнес болон иргэдэд зориулсан бүх төрлийн баримт бичгийн харилцааг зохицуулах олон талт өгөөжтэйгөөрөө онцлог билээ. Тэд 7 сард Startup World Cup Central Asia -д өрсөлдөхөөс гадна 8 сард Google for Startup accelerator, 9 сард Japan Business matching trip, 10 сард Tech Crunch Disrupt зэрэг олон тэмцээнд эх орноо төлөөлөн оролцохоор болсон юм.
Урьд нь манай улсад ийм өндөр буюу 300 сая төгрөгийн шагналын сантай, олон улсад өрсөлдөх үндэсний ялагчаа олон нийтэд нээлттэй шалгаруулж, үндэсний томоохон компаниудтай хамтран ажиллах боломжийг нээсэн тэмцээн зохиогдож байгаагүй нь уг тэмцээний Стратегийн түнш TechPack – MCS Software Group-н дэмжлэгтэйгээр бодит болсон юм.
