НИТХ-ын хурал Нийслэлийн бонд гаргах асуудлаар өнөөдөр ээлжит бусаар хуралдлаа. Нийслэл 2.3 их наяд төгрөгийн гадаад бонд гаргах бөгөөд энэ нь нийслэлийн нэг жилийн төсөвтэй тэнцэх юм. Тиймээс НИТХ-ын төлөөлөгчдийн асуултад хотын дарга Х.Нямбаатар хариуллаа.

-Сүхбаатар, Чингэлтэй дүүргийн нутаг дэвсгэрт 12000 айлын орон сууцыг нийслэл барина. Энэ хавийн айлуудын 1000 га газрыг орон сууцаар солино. Төлөвт, дэд бүтцийг нь хийгээд барилгын компаниудад дуудлага худалдаагаар олгоно. Ингэж 2.3 их наяд төгрөгийг таван жилийн хугацаанд эргүүлж олно.

-Гүйцэтгэлээрээ бондоо босгоно. Шууд 2.3 их наядын гадаад бондыг босгохгүй. Батлагдсан зураг төсөв ТЭЗҮ дээрээ гүйцэтгэгчийг сонгон шалгаруулсны дараа нээлттэй байдлаар гурван үе шаттай босгоно.

-Нэг га газрыг нэг тэрбум төгрөгөөр зарна. 1000 га газрыг чөлөөлж, Улаанбаатар хотын хойд хэсгийн гэр хорооллыг орон сууцжуулна.

-Дотоод бондын мөнгийг хот эргэн төлөхгүй. 300 тэрбум төгрөгөөр Бөөрөлжүүтийн цахилгаан станцыг барьснаар 2024 онд нэгдүгээр блокийг ашиглалтад оруулна. 2025 оны аравдугаар сард дараагийн блокийг ашиглалтад оруулах нөхцөлтэй дамжуулан зээл хийж байгаа. Хүү, эргэн төлөлтийг хувийн аж ахуй нэгжүүд өөрсдөө төлнө. Гурав, дөрөвдүгээр блок гэж байгаа.

-Гадаад бонд гарсан тохиолдолд зургаан сар тутам хүүг төлнө. Сангийн яам, Засгийн газраас хэдэн төгрөгийн бонд босгох боломжтой гэсэн дүгнэлт гаргуулна.

-Түгжрэлийг бууруулахад 150 тэрбум төгрөг төсөвлөсөн. Түгжрэлийг бууруулах төсөл дотоод бондоос зарцуулах 150 тэрбум төгрөг хоёр агуулга нь адил боловч бүтцийн хувьд өөр. Бид 2025, 2026 онд нийслэл хот замаа хучих Замын сангийн мөнгөө урьдчилж хэрэглэж байгаа гэсэн үг.

-Улаанбаатарт бүтэн зам байхгүй. Өнгөрсөн өвөл маш их хүйтэрч, цас орж, бодис цацаж цэвэрлэсэн. Тиймээс Улаанбаатар хотын авто замын стандартыг шинэчлэх шаардлагатай.

-Баянхошуунд Азийн хөгжлийн банк болон Уур амьсгалын өөрчлөлтийн сангийн нэн хөнгөлөлттэй зээлээр барилгажилтын ажил эхэлсэн явж байгаа. Удахгүй нэмж шинэ эх үүсвэрийг НИТХ-д оруулж ирж шийдвэрлүүлнэ. Яг энэ төлөвлөлтийн дагуу явахад ойрын дөрвөн жил Баянхошууг орон сууцжуулж дуусна.

-Хоёр сая хүн амтай Улаанбаатар хотын төв цэвэрлэх байгууламж лаг цэвэрлэх байгууламжгүй. 60 жилийн өмнө лагаа зөөж хаядаг байсан. Дараа жилийн хамгийн том ажил бол лаг боловсруулах үйлдвэр барих. Цэвэрлэх байгууламжийн асуудлыг 2024, 2025 онд шийднэ.