Азийн орнуудын эдийн засаг сайнгүй байгаа бөгөөд бүс нутгийн эдийн засгийн өсөлт 2023 онд 5.1 хувь байсан бол энэ онд 4.5 хувь хүртэл буурна гэж Дэлхийн банк даваа гаригт гаргасан тайландаа дурджээ. Азийн эдийн засаг тахлын өмнөхөөс илүү удаан сэргэж байгаа ч дэлхийн бусад орнуудаас илүү хурдацтай хөгжиж байна.
Дэлхийн банкны Зүүн Ази, Номхон далайн бүсийг хариуцсан ахлах эдийн засагч Аадитя Маттоо "Тус бүс нутаг дэлхийн бусад орнуудаас илүү сайн үзүүлэлттэй байгаа хэдий ч зорилтот түвшиндээ хүрэхгүй байна" гэжээ. Гол эрсдэл бол АНУ-ын Холбооны нөөцийн сан болон бусад томоохон төв банкууд бодлогын хүүгээ тахлын өмнөхөөс өндөр байлгаж болзошгүй юм. Өөр нэг зүйл бол 2023 онд тогтоосон өндөр тариф, татаас зэрэг худалдааг гажуудуулах саад бэрхшээл гэдгийг тайланд онцолжээ. БНХАУ-ын эрх баригч Коммунист нам эдийн засгаа энэ онд тав орчим хувиар өснө гэсэн албан ёсны зорилт тавьсан нь өнгөрсөн оны 5.2 хувиас доогуур үзүүлэлт юм.
Маттоо "Хятадын өмнө тулгамдаж буй асуудал бол үр ашигтай бодлого баримтлах явдал юм. Төсвийн урамшуулал нь бүтцийн тэнцвэргүй байдлыг засахгүй. Нийгмийн халамжийг бэхжүүлэх болон өрхүүдэд илүү их мөнгө зарцуулах, эрэлтийг нэмэгдүүлэх, улмаар бизнесүүдийг хөрөнгө оруулалт хийхийг дэмжих бусад хөтөлбөрүүд хэрэгтэй” гэв. Жишээлбэл, Вьетнам гадаадын үйлдвэрлэгчдийн хувьд таатай бүс болгон гадаадын асар их хэмжээний хөрөнгө оруулалтыг татаж байгаа ч эдийн тав орчим хувийн өсөлт нь харьцангуй доогуур үзүүлэлт юм. Азийн тэргүүлэгч компаниуд баян чинээлэг орнуудын тэргүүлэгчдээс, ялангуяа технологитой холбоотой салбаруудаас хол хоцорч байгаа аж.
