АНУ-ын сансар судлалын “SpaceX”-ын охин компани болох хиймэл дагуулын интернэт үйлчилгээ үзүүлэгч “Starlink” компанийн сүлжээ Монгол Улсад албан ёсоор нэвтэрсэн. Ингэснээр шилэн кабельд холбогдоогүй алслагдсан орон нутгийн сумд болон утасны сүлжээгүй байсан ч Монгол Улсын аль ч цэгээс өндөр хурдны интернэтийн үйлчилгээ авах боломж нээгдсэн.

Тэгвэл "Starlink"-ийн албан ёсны вебсайтад мэдээлснээр өрхийн хэрэглээнд зориулсан интернэтийн сүлжээ хүлээн авагч төхөөрөмж Монгол Улсад 1.525.000 төгрөг, 1-2 долоо хоногт хүргэх бөгөөд тээврийн зардал 150 мянган төгрөг байх аж.

Та, "Starlink"-ийн вебсайтын нүүр хэсэгт харагдах "Order Now" цэсэнд өөрийн байршлаа оруулж үйлчилгээний үнэ тариф, төхөөрөмж захиалах болон бүртгүүлэх талаар мэдээлэл авах боломжтой.

Өрхийн хэрэгцээнд зориулсан интернэт үйлчилгээний хувьд:

• Хязгааргүй дата хэрэглээ бүхий "150-300Mbps" интернэт хурд
• Өрх айл зөвхөн нэг байршилд ашиглахад сарын 185 мянган төгрөг
• Нүүдэлчин болон аялагч нар Монгол Улсын газар нутагт хүссэн байршилдаа ашиглахад сарын 250 мянган төгрөгийн үнэтэй байна.
• Нэг хүлээн авагч төхөөрөмж(router)-д гар утас, таблет, нөүтбүүк зэрэг 128 хүртэлх төхөөрөмж зэрэг холбогдох боломжтой

Энэ нь "Starlink"-ийн сүлжээ нэвтэрсэн дэлхийн бусад улстай харьцуулахад илүү хурдтай бөгөөд харьцангуй хямд үнэтэй байх аж. Тодруулбал, "Starlink"-ийн өрхийн интернэтийн "Standard" үйлчилгээ АНУ-д "25-220Mbps" хурдтай, сарын 110 ам.долларын үнэтэй. Харин "Mobile" буюу олон байршилд ашиглаж болох хөдөлгөөнт үйлчилгээ нь сарын 150-250 ам.долларын сонголттой байна. Өөрөөр хэлбэл, манай улсад "Starlink"-ийн үйлчилгээ АНУ-тай харьцуулахад хоёр дахин хямд байна.