Нийслэлийн иргэдийн төлөөлөгчдийн хурлын XXI дэх хуралдаан боллоо. Уг хуралдаанаар Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хуулийг баталсантай холбоотойгоор хэд хэдэн асуудлыг хэлэлцэж, холбогдох журмыг баталлаа.

Тухайлбал, хуралдаанаар:

-Нийслэлийн нийтийн тээврийг хөгжүүлэх сан байгуулж, сангийн хөрөнгийг бүрдүүлэх, захиран зарцуулах, хяналт тавих журам,

-Нийслэлийн нутаг дэвсгэрт нийтийн эзэмшлийн авто зогсоолыг төлөвлөх, барьж байгуулах журам,

-Нийслэл хотод олгох тээврийн хэрэгслийн улсын бүртгэлийн дугаарын дээд хязгаар тогтоох тухай,

-Авто зам ашигласны төлбөрийн хэмжээг шинэчлэн тогтоох тухай,

-Авто тээврийн болон өөрөө явагч хэрэгслийн албан татварын хэмжээг батлах тухай,

-Амьтны хүрээлэн ажиллуулах журам,

-Мал аж ахуй эрхлэхийг хориглох бүсийн хязгаарыг тогтоож, журам батлах болон бусад асуудлыг хэлэлцсэн юм. Тэгвэл уг хуралдаанаар баталсан онцлох журмыг танилцуулж байна.

• Хувийн болон нийтийн зориулалттай авто зогсоолыг нэгдсэн санд бүртгэхээр боллоо. Ингэснээр иргэд зорчих гэж буй тухайн газрынхаа ойр орчимд зогсоол байгаа эсэхийг шалгаж очих боломжтой юм.
• Нийслэл хотод олгох тээврийн хэрэгслийн улсын бүртгэлийн дугаарын дээд хязгаар тогтоох тухай тогтоолын төслөөр нийслэлд олгох тээврийн хэрэгслийн дугаарын дээд хязгаарыг 730 мянган байхаар тогтоолоо. Ингэснээр 730 мянгаас дээш тооны автомашинд улсын дугаар олгохооргүй болж байна гэсэн үг юм.
• Нийтийн тээврээр зорчих төлбөр одоогоор том хүн 500 төгрөг, хүүхэд 200 төгрөг байгаа. Тэгвэл өнөөдрийн баталсан журмаар нийтийн тээврээр зорчих төлбөрийг 1000 төгрөг байхаар тогтоолоо. Гэхдээ мянган төгрөг нь нэг удаагийн зорчилт бус өдрийн турш зорчих төлбөр юм. Товчхондоо, иргэн мянган төгрөгийг төлж, өдөрт дөрвөн удаа зорчих боломжтой юм.
• Авто зам ашигласны төлбөрийн хэмжээг шинэчлэн тогтоож, орон нутгийн тээврийн хэрэгсэл нийслэлд 48 цаг зорчих юм бол 1000 төгрөг, 48-аас дээш цагаар нийслэлд зорчих юм бол хоног тутамд 5000 төгрөг төлнө.