Улс төр | 3 мин уншина

Ардчилсан намын үе шилжилт

Ардчилсан намын үе шилжилт
Нийтэлсэн 2024 оны 1 сарын 9

Ардчилсан нам өнгөрсөн долоо хоногт шинээр томилсон Нарийн бичгийн дарга нараа танилцуулав. 1990-ээд оны залуусын төлөөллийг намын удирдах түвшинд оруулсан нь  цагаа олсон сонголт мөн, "бай"-гаа оносон томилгоо байлаа. 

  • АН-ын Боловсролын асуудал хариуцсан Нарийн бичгийн даргаар Э.Энхпүрэвийг,

  • АН-ынХөгжлийн бодлогын асуудал хариуцсан Нарийн бичгийн даргаар С.Цэнгүүнийг

  • АН-ын Залуучуудын хөгжлийн бодлого хариуцсан Нарийн бичгийн даргаар Б.Батзаяаг

  • АН-ын Гадаад харилцаа хариуцсан Нарийн бичгийн даргаар Б.Энхдөлгөөнийг,

  • АН-ын Бизнес хөгжил, технологи, инновац хариуцсан Нарийн бичгийн даргаар Н.Гансүх нарыг тус тус томилов.

Ганц улстөрд гэлтгүй нийгэмд үеийн шилжилт болж байгаа энэ цаг үед залуу үе рүүгээ чиглэсэн нь шинэлэг, бас нүдээ олсон томилгоо байв. Нэг үгээр, улстөрд ах нарын эрин үе төгсөх цаг ирж байгааг харах, мэдрэх иргэдэд таатай байсан учраас АН-ын дээрх томилгоог алга ташин хүлээж авсан биз. Өнгөрсөн 30 гаруй жил төр удирдсан дарга нар өнөөдрийн нийгмийг бүтээсэн учраас хоёр том намаас шинэ, залуу үе гарч ирэхийг олон нийт хүсэж, хүлээж байна. Нөгөө талаар өнгөрсөн Их хурлын сонгуулийн үед манай улсын нийт сонгогчдын 42.2 хувь нь 45 хүртэлх насныхан буюу залуучууд байсан. Энэ утгаараа ч зургадугаар сард болох Их хурлын сонгуульд амжилттай оролцохын тулд залуус руу чиглэсэн, тэдний дэмжлэгийг авах мөрийн хөтөлбөр, үзэл баримтлал, улстөрчдийг шинээр оруулж ирэх шаардлага бүх улс төрийн намын өмнө ирлээ.

Сонгуулийн хоёр цикль дараалан нэг нам бүх түвшинд засгийн эрх барьж байгаа энэ цаг үед парламентад хүчтэй сөрөг хүчин магадгүй, олонх болох, засгийн эрх авах нам үгүйлэгдэж байна. Нөгөө талд Засгийн эрх барьж байсан АН өнгөрсөн найман жилийн хугацаанд УИХ-д бүлэггүй болтлоо уналтад орсон нь ах нарын шуналын хор. Өнөөх л хэд энэ намдаа хэвээр, шинэ үеэ ч хүлээн зөвшөөрдөггүй, оруулдаггүй, буглаж бугшсан мэт салахгүй, намаа ч нар харуулалгүй байлгасаар ирснийх.

Харин одоо Ардчилсан нам дахиад босох хүнд замыг туулсаар явна. Намын даргын сонгууль, тэргүүн дэд дарга, генсекийн томилгоо, 15 дэд даргын томилгоо ч фракцуудынхаа эрх ашгийг хангах гэсэн аргацаасан арга. Эдгээр томилгоонд Н.Алтанхуягийн Алтангадасын угшилтай залуус, Ц.Элбэгдоржийн харьяалалтай гэгддэг залуус, Х.Баттулгын залуус, МҮДН-ийн залуусын төлөөлөл, болон дундын бүсийн залуус ч орсон. Ямартай ч ах нарын хувийн хэрүүл, өш хонзонгийн хажуугаар шинэ үеийн залуусыг удирдлагадаа оруулж ирж байгаа нь нь Монголын улстөрд сайн мэдээ.

Бүтэн найман жил бүх түвшинд үнэмлэхүй олонх болсон МАН-ын хуульчлагдсан дарангуйлал, эдийн засгийн чөлөөт уналтын эсрэг тэмцэх шинэ хүч гарч ирж байгаад иргэд ч баяртай байна. Ардчиллыг АН гэж хардаг, АН-тай холбож ойлгодог олон мянган хүн бий. Тиймээс АН муу явах нь Монголын ардчилал үнэгүйдэхэд хүрээд байгаа учраас АН-ынхан босож ирэх, дахин засгийн эрх авах, засгийн эрхийн төлөө өрсөлдөх “том” нам болох шаардлага бий болоод байна. Тиймээс л олон нийт ах нарын хэрүүл, эрх мэдлийн төлөөх тэмцлийн хажуугаар гарч ирж буй залуу үед итгэл найдвар тээн хүлээн авч байна. Нөгөө ах нар биш байгаа нь л.....

Сэтгүүлч Л.Одончимэг нь iToim.mn сайтын редактораар ажилладаг. 2016 оноос хойш улс төрийн чиглэлээр дагнан бичиж байгаа бөгөөд сэтгүүл зүйн салбарт 11 дэх жилдээ ажиллаж байна.
Odnoo Odnoo-facebookОдончимэг itoim-twitter
Онцлох мэдээ
Сүүлд нэмэгдсэн