-Төрийн өмчит уул уурхайн компаниудаас бусад уурхайнууд дизель түлшгүй зогсжээ-

Дизель түлш тасарснаас болж Оюу толгой, Тавантолгой, Эрдэнэт үйлдвэрээс бусад уул уурхайн компанийн үйл ажиллагаа ерөнхийдөө зогсонги байдалд орсныг эх сурвалж мэдээллээ.

Шатахуун, дизель түлшний нийлүүлэлт хэвийн болно гэсэн эрх баригчдын үг худлаа болж, улсын эдийн засгийг нуруундаа үүрч, төсөв бүрдүүлдэг уул уурхайн салбарын ажил зогсоод байна. Шатахуун, дизель түлш хомсдоод хоёр сар болж байгаа ч хэвийн байдалд оруулж чадахгүй өнөөдрийг хүрч, уурхайнууд үйл ажиллагаагаа тодорхойгүй хугацаагаар зогсоохоос өөр аргагүй болжээ.

Манай улс жилд 90 гаруй мянган тонн дизель түлш хэрэглэдэг бөгөөд үүний 60 гаруй хувийг уул уурхайн салбарт ашигладаг байна. Тэгвэл энэ жил манай улсын уул уурхайн бүтээгдэхүүний экспорт түүхэнд байгаагүй дээд хэмжээнд хүрч арванхоёрдугаар сарын байдлаар 68 сая тонн нүүрс гаргасан. Үүнийг дагаад дизель түлшний хэрэглээ нэмэгдэж, хомсдол үүссэн хэмээн салбарын сайд нь мэдэгдсэн. Тодруулбал, уул уурхайн экспорт өмнөх оныхоос 40 хувиар нэмэгдсэнээр дизель түлшний хэрэглээ өссөн. Гэхдээ салбарын сайд хэрэглээндээ тааруулж, захиалга өгөөгүйгээс болж өнөөдөр уул уурхайн компаниуд үйл ажиллагаагаа зогсооход хүрээд байна.

Өөрөөр хэлбэл, дизель түлшний захиалгыг өсөн нэмэгдэж буй экспорттойгоо уялдуулж өгөөгүйгээс хомсдол үүссэн. Энэ бол эдийн засгийн төлөвлөлт буруу, цэвэр зохион байгуулалтын асуудал. Эрэлтийг хангах хэмжээний нийлүүлэлтийг ОХУ-аас тогтвортой хийж байхад манай улс өсөн нэмэгдэж буй эрэлт хэрэгцээндээ тохируулж захиалгаа өгөөгүйгээс дөнгөж шинэ он гарахтай зэрэгцээд уурхайнууд үйл ажиллагаагаа зогсоогоод байна. Жижиг, хувийн уурхайнууд болон хөдөө орон нутгийн айл өрхүүд түлшгүйгээс болж аль эрт унаа тэргээ тавьж, үйл ажиллагаагаа зогсоосон.

Салбарын сайд нь бүр болохгүй бол уул уурхайн салбарт хэрэглэж байгаа түлшийг багасгана гэж өнгөрсөн арваннэгдүгээр сард мэдэгдэж байсан. Тэрээр "Ер нь, тасалдал байхгүй. Харин хэрэглээн дээр бид гүйцэхгүй байна. Хэрэв иргэдийн хэрэглээ тэг зогсож, Багануурын уурхайнд түлш байхгүй, автобус явахгүй болох юм бол уул уурхайн түлшийг багасгахаас өөр аргагүй" гэж байсан юм. Тэгвэл сайдын энэ үг биеллээ олж, уурхайнууд ажиллаж чадахгүй зогсож, ажилчдаа тодорхойгүй хугацаагаар амраажээ.

Уул уурхай, хүнд үйлдвэрийн сайд Ж.Ганбаатар бүхэл бүтэн улсын нэг салбарыг хариуцан ажиллаж байж, өмнө нь авдаг байсан түлш, шатахууны хэмжээгээ л яриад зогсож байна. Манай хэрэглээ нэмэгдсэн. Өсөн нэмэгдэж буй хэрэглээндээ тааруулж захилга өгч, зохион байгуулалт хийж ажиллаж чадаагүйгээс улсаараа түлш, шатахууны хомсдолд орж, одоо бүр уул уурхайн салбарыг тэр чигт нь зогсоолоо. Хэзээнээс дизель түлшгийг хэрэглээндээ тааруулан авч, хэвийн болгох вэ Ж.Ганбаатар сайд аа.