Волейболын Үндэсний дээд лигийн 2023-2024 оны улирлын хоёрдугаар тойргийн тоглолтууд үргэлжилж байгаа билээ. Тэгвэл энэ үеэр шигшээ багийн тамирчин, Монголын багийн спортын анхны эмэгтэй легионер тамирчин Г.Хандсүрэн буюу Дархан аварга Х.Баянмөнхийн ач охин үндэсний дээд лигт тоглох боломжгүй болсон билээ. Түүний хувьд 2022-2023 жилийн Үндэсний дээд лигт “Улаанбаатар” клубээс тоглосон. Харин энэ жил "Ховд Ижил Алтайн Барс" клубт элсэн арваннэгдүгээр сарын 8-нд эхний тоглолтоо хийсэн ч холбооны зүгээс тоглуулах боломжгүй гэдгийг илэрхийлээд байгаа. Тэгвэл уг асуудал дээр Г.Хандсүрэн өөрийн тайлбарыг хийлээ.

Тэрээр, "Холбоо, клуб хоёрын ойлголцлын зөрүүгээс болж тоглохоо больсон. ITC гэж зүйл байдаг. Би үүнийг гурван удаа авч байсан. Гадагшаа явж тоглох бүрд ITC авдаг юм. Энэ нь International transfer certificate гэсэн товчилсон үг. Үүнийг авснаар олон улсад тоглох боломжтой ямар нэг асуудалгүй, хэрэгт холбогдож байгаагүй тамирчин хүн мөн гэдгийг баталж тамирчны дугаар олгодог. Үүнийг авсан хүнийг легионер тамирчин гэж ойлгож болно. Үүн дээр ойлголцлын зөрүү гарч байгаа юм. Ховд Ижил Алтайн Барс гэдэг клубтэй монгол легионероор тоглох боломжтой гэдэг яриа клуб холбоо хооронд гарсан. Яагаад холбооноос Монгол легионер гэдэг нэршил гаргах болсныг би сайн ойлгоогүй. Гэхдээ би ITC авсан тамирчин учраас легионер тамирчинтай ижил түвшинд байгаа. Монголд ирж байгаа легионертэй адилхан гадагшаа очдог легионер нь би. Тэр сертификат нь байгаа болохоор тэдэнтэй адил тоглож болно гэх ойлголтын зөрүү үүсчихсэн. Монголд нэг баг хамгийн дээд тал нь гурван легионер авч болно. Тэгээд тэр легионерийнхоо зайнд намайг тоглуулна гээд монгол 14 тамирчны нэрсдээ оруулаагүй. Легионер тамирчин хоёрдугаар тойргийн эхний тоглолтоос өмнө ирж тоглох ёстой гэдэг хугацааг холбооноос заасан. Миний хувьд клубт өгч байсан мэдэгдлийн дагуу хоёрдугаар тойргоос өмнө легионер тамирчидтай адилхан нэрээ өгч, гэрээ хэлэлцээрийг хийж, Ховд Ижил Алтайн Барс клубт дуудагдан нэг тоглосон. Энэ тоглолтын дараа тоглох боломжгүй гэдэг хариуг холбооноос авсан. Энэ нь хувь хүн эсхүл миний харилцааны асуудал биш. Харин холбооноос манай ахлах дасгалжуулагч, менежерт монгол хүн легионер тамирчин гэж нэрлэгдэх боломжгүй гэдгийг хэлсэн. Яалт ч үгүй, монгол легионер гэдэг нэршил дээр ойлголцлын зөрүү гарчихлаа гэж ойлгоод байна. Би хэдий ITC-тэй легионер тамирчдын түвшинд байгаа ч монгол тамирчин, Монгол Улсад тоглож байгаа учир ITC үйлчлэхгүй гэдэг дүрэм журмыг холбооноос надад хэлсэн. Би тамирчин хүн. Тиймээс ахлах дасгалжуулагч, холбооны энэ шийдвэрийг ойлгож, дагана. Цаашид дүү нар алдаа гаргах вий. Жаахан үл ойлголцлоос үүдэн бүхэл бүтэн улирлаа алдах вий гэж санаа зовж байна. Монгол легионероор тоглож болно гэсэн. Болно гэснийх нь дагуу нэрээ өгч орсон ч тоглуулсангүй" хэмээсэн юм.