Яармагийн 300 ортой эмнэлэг буюу Эх, нярай эмэгтэйчүүдийн үндэсний төв II-т хэвтэн эмчлүүлж байсан 17 хүүхэд өчигдөр 22.00 цагт цагийн тариа хийлгэсний дараагаас бөөлжиж, таталт өгч, ухаан алдаж унасан байна. Тиймээс тус дүүргийн цагдаагийн газрын хоёрдугаар хэлтсийн даргаар ахлуулсан Ажлын хэсэг мөрдөн шалгах ажиллагаа явуулж байна.

Цагийн тарианд хүндрэл өгсөн 17 хүүхэд дөрвөн сартайгаас 12 насны хүүхдүүд байсан бөгөөд одоо биеийн байдал тогтворжжээ. Тухайн тасагт нийт 52 хүүхэд хэвтэн эмчлүүлж байснаас 22.00 цагийн тариаг 21 хүүхдэд хийжээ. Ингэхэд сүүлийн хүүхдэд тариа хийж байхад эхний хүүхдэд шинж тэмдэг илэрчээ.

Эх, нярай эмэгтэйчүүдийн үндэсний төв II-ын захирал У.Цэвэгмид "Өчигдөр 22.00 цагийн үед цагийн тариан дээр 17 хүүхдэд урвал гарсан. Энэ хүүхдүүд манай эмнэлэгт хэвтээд 4-5 хонож байсан. Өөрөөр хэлбэл, цагийн тариа хийгээд ямар нэгэн урвал хүндрэл өгөөгүй явж байсан.

Өнөөдрийн байдлаар манай эмнэлэгт 400 орчим хүүхэд хатгаа оноштой хэвтэн эмчлүүлж байна. Энэ хүүхдүүдэд цагийн ижил тариа хийж байгаа. Бусад хүүхдүүдэд ямар нэгэн урвал хүндрэл өгөөгүй. Бид шөнө 00.00 цагт дуудагдаж ирээд бүх хүүхдийн тарианд тандалт хийж үзлээ. Урвал өгсөн 17 хүүхэд маш өндөр халуурсан, чичирхийлж байсан. 2-3 цагийн дотор хүүхдийн эрчимт эмчилгээний бүх эмчийг дуудаж нэг хүүхдэд нэг эмч оногдохоор тусламж үзүүлсэн. Ингээд 2-3 цагийн дараа хүүхдүүдийн халуун бууж тогтворжиж, унтсан. Өглөө 06.00 цагт тухайн тариаг давтаж хийхгүйн тулд эм уухаар сольсон. Энэ тариаг хийгээд урвал гарсан шалтгааныг тодруулахаар шөнөжин ажиллалаа. Тухайн тариаг найруулсан бодисыг шалгаж байна. Бүх хүүхдэд ижил хийж байгаа учраас тариатай холбоотой биш гэж үзэж байгаа. Тариа хийсэн сувилагчийг тарианы стандарт алдсан гэж дүгнэж байна. Сувилагчтай холбоотой асуудлыг чанарын алба хурлаа хийгээд хариуцлага тооцно.

Гурван өөр төрлийн антибиотик хийсэн. Тарианы хугацаа 2024 оны хоёрдугаар сард дуусах байсан. Тиймээс Эм зүйн албанаас тарианы хугацаа дуусах болоогүй гэж хэлсэн. Эдгээр 17 хүүхдийг насанд хүртэл нь хянахаар асран хамгаалагчдад нь амласан. Хүүхдэд гарч болох дараагийн урвалыг хамгийн ойрын хугацаанд шинжилгээ хийж, илрүүлнэ. Шөнө 02.00 цагт авсан шинжилгээгээр хүүхдүүдийн аминд халтай зүйл байхгүй байсан. Тиймээс биеийн байдал тогтворжсон гэж үзээд цагийн тариагаа өөрчлөөд явж байгаа.

Тариаг найруулсан бодис  ямар байгааг бид гаднаас нь хараад хэлж  чадахгүй учраас шинжилгээний дараа тодорхой болно. Ээлжид гарч байсан сувилагч улсад 20 гаруй жил ажилласан” гэлээ.