УИХ-ын гишүүн асан Т.Аюурсайхан, "Эрдэнэс тавантолгой" ХК-ийн гүйцэтгэх захирал асан Б.Ганхуяг нарын 11 хүний холбогдох хэргийн гэм буруугийн шүүх хурал Чингэлтэй, Сүхбаатар, Баянзүрх дүүргийн эрүүгийн хэргийн анхан шатны шүүхэд өнөөдөр 11:00 цагт эхэлсэн. Гэвч шүүх хурал тодорхой шалтгааны улмаас хоёр дахь удаагаа хойшиллоо. Шүүх хурлын үеэр хэн юуг хэлэв гэдгийг тоймлоё.

"Эрдэнэс тавантолгой" ХК-ийн гүйцэтгэх захирал асан Б.Ганхуяг: Есдүгээр сараас хойш тэсээд л байна. Миний биеийн байдал сайнгүй байгаа. Хамаг биеэр юм туурсан. Зураг авдаггүй юм билээ. Өмнө нь идээ гараад байсан юм. Тэгсэн одоо идээ нь шимэгдээд хоёр хөл явахад хэцүү болж байна. Би 416-р ангийнханд хүсэлт тавьсан. Миний уруул, буйл, гар үзүүрээсээ хөхрөөд эхэлж байгаа. Ямар нэг хордлого байж магадгүй. Цусны шинжилгээ авсан ч надад хариуг нь үзүүлээгүй. Яагаад үзүүлээгүй юм гэхээр хэвийн гарсан гэдэг зүйл л хэлдэг. Ямар ч байсан хоёрдугаар шатлалын эмнэлэгт арьс, биеэр гарч буй зүйл, буйл, гар харлаад байгаа асуудлыг шийдэж, эмчилгээнд орохгүй бол болохгүй юм шиг байна. Хувь хүний хувьд ийм зүйл яриад байдаг хүн биш. Яагаад гэвэл асуудлаас зугтаж биш зүтгэж ард нь гардаг.

Би өнөөдөр цагаатгах хатуу байр суурьтай шүүх хуралд орж байгаа. Үүндээ ч итгэлтэй болсон. Учир нь 194 хавтаст материалын ард намайг буруутгах юу ч байгаагүй. Зөвхөн гэрчийн мэдүүлгүүд буюу нэг мэдүүлгийн нөгөө мэдүүлгээр сольж авсан зүйлүүд байна. Уг нь мөрдөн шалгах явцад янз бүрийн зүйл тогтоогдсон юм болов уу гэж 11 сар  хоригдсон.