Бид төдийлөн анзаардаггүй ч "Google"-ын бүтээгдэхүүн, үйлчилгээ бидний эргэн тойронд хаа сайгүй байдаг. Та ямар төхөөрөмж ашиглаж байгаагаас үл хамаараад онлайн орчинд зайлшгүй "Google" хайлт болон бусад үйлчилгээгээр дамжих шаардлага тулгардаг. Товхондоо, "Google" бидний өдөр тутмын амьдралын салшгүй нэг хэсэг болж, тэр хэрээр хэрэглэгчийн хувийн мэдээлэлтэй холбоотой асуудал тулгамдах болсон.
Тиймээс АНУ-ын Хууль зүйн яам 2023 оны нэгдүгээр сард "Google" компани интернэт хайлт, дижитал зар сурталчилгааны зах зээлийг хууль бусаар монополчилсон гэх үндэслэлээр буруутгаж, монополийн эсрэг зарга үүсгэсэн. Үүнд, "Android" үйлдлийн систем бүхий ухаалаг гар утсан дээрх анхдагч интернэт хөтөчийг "Google Chrome" болгон тохируулдаг, "Google" хайлтын системд өрсөлдөгч компаниудынхаа эсрэг өөрт давуу байдал олгодог гэх асуудлыг хөндсөн.
Тэгвэл "Google" компанид холбогдох монополийн эсрэг шүүх хурал өнөөдөр эхэллээ. Уг шүүх хурал нь 2001 онд АНУ-ын Холбооны худалдааны комисс "Microsoft" компанид монополийн эсрэг зарга үүсгэснээс хойш дэлхийн технологийн салбарт болж буй хамгийн том монополийн эсрэг шүүх хурал болж байгаа юм.
2023 оны зургадугаар сарын байдлаар 4.3 тэрбум хэрэглэгчтэй "Google Search" дэлхийн хэмжээнд интернэт хайлтын системын зах зээлийн 90.68 хувийг дангаараа эзэлж байна. Тэдний хамгийн том өрсөлдөгч болох "Microsoft"-ын "Bing" хайлтын систем 2023 оны хоёрдугаар сард 10 тэрбум ам.долларын хөрөнгө оруулалт хийж, өөрсдийн хиймэл оюунд суурилсан "Bing Chat" чатботыг танилцуулснаар зах зээлийн хэмжээ нь 3.2 хувиас 5.5 хувь болж өссөн. Гэвч "Google" 2023 оны гуравдугаар сард өөрсдийн "Bard" чатботыг танилцуулснаар өрсөлдөөнд үнэмлэхүй давамгайллаа хадгалсан хэвээр байгаа юм.
Түүнчлэн "Google"-ын бусад бүтээгдэхүүн, үйлчилгээ нь зах зээл бүрд давамгай гэдэг утгаар технологийн салбарын хамгийн том монополд тооцогддог.
o YouTube: Медиа тоглуулагч, стрийминг үйлчилгээний зах зээлийн 97.47 хувь
o Google Translate: Веб орчуулагчийн зах зээлийн 77.39 хувь
o Google Play Store: "App Store"-ын зах зээлийн 74.85 хувь
o Android OS: Ухаалаг гар утасны үйлдлийн системийн зах зээлийн 70.89 хувь
o Google Chrome: Веб хөтөчийн зах зээлийн 63.56 хувь
o Google Maps: Хайлтын маркетингийн зах зээлийн 68.24 хувь
o Google Drive: Файл хуваалцах програм хангамжийн үйлчилгээний 28.13 хувь
o Gmail: Цахим шуудангийн үйлчилгээний зах зээлийн 27.96 хувь
o Google Ads: Зар сурталчилгааны зах зээлийн 23.08 хувийг тус тус эзэлж байна.
Мөн "Google Pay" онлайн төлбөр тооцоо, "Google Fi Wireless" үүрэн холбоо, интернэт үйлчилгээ, "Google Nest" гэр ахуйн ухаалаг цахилгаан бараа, "Google Pixel" ухаалаг гар утасны зах зээлд тодорхой хувийг эзэлдэг. Цаашдаа, бүтээгдэхүүн үйлчилгээний хувьд хиймэл оюун, уул уурхай, усны хайгуулын, технологи, квант компьютерын салбарт хамгийн том тоглогч болох зорилго тодорхойлсон.
"Google" компани монополийн эсрэг шүүх хуралд "зах зээлийн давамгай байдал, олон тэрбум хэрэглэгчтэй системүүдээ өрсөлдөөнийг нухчин дарах зорилгоор зохион байгуулах бус технологийн бусад компаниудаас илүү сайн, хамгийн шилдэг бүтээгдэхүүн, үйлчилгээг хэрэглэгчдэд санал болгож, хүлээн зөвшөөрөгддөг" гэж мэтгэлцэх төлөвтэй байна. Тиймээс технологи сонирхогчид ирэх өдрүүдэд "Google" үнэхээр монопол уу, эсвэл хамгийн шилдэг нь үү гэдэг асуултад хариулт авах юм.
