Засгийн газрын ээлжит хуралдаанаар Цагдаагийн ерөнхий газрын даргыг шинээр томиллоо. Хуучин дарга Ж.Болд нь эрүүл мэндийн шалтгаанаар өнгөрсөн долоо хоногт ажлаа өгсөн. Тэгвэл дараагийн даргыг Ж.Болдын удирдлага дор ажиллаж байсан Эрүүгийн цагдаагийн албаны дарга, хурандаа Т.Сүхболдыг томилов.

Т.Сүхболд нь 1980 онд Улаанбаатар хотод төрж, ажлын гараагаа Сонгинохайрхан дүүргийн цагдаагийн газраас эхэлж, 2005-2013 онд Хэнтийн аймгийн цагдаагийн байгууллагад ажиллажээ. Тэрээр 2013 оноос ЦЕГ-ын Эрүүгийн цагдаагийн албаны эдийн засгийн гэмт хэрэгтэй тэмцэх хэлтэст ажиллаж байгаад 2020 оноос Ж.Болдыг ЦЕГ-ын даргаар томилогдоход Эрүүгийн цагдаагийн албаны дарга болсон.

Т.Сүхболд нь Эрдэнэт үйлдвэрийн 49 хувь, Салхитын мөнгөний орд, койн, цахим луйвар, нүүрсний хулгай, "шувуу ажиллагаа" зэрэг улс төр, эдийн засгийн томоохон гэмт хэрэг дээр ажилласан. Ер нь цагдаагийн байгууллагад ажилласан цагаасаа эдийн засгийн чигтэй гэмт хэргүүд дээр ажиллаж, энэ чиглэлд багагүй туршлага хуримтлуулсан нэгэн аж.

Тэрээр Ерөнхий сайд Л.Оюун-Эрдэнийн төрсөн нутаг Хэнтийгээс гаралтай, мөн 1980-иад оны төлөөлөл гэдгээрээ анхаарал татаж байна.

Ингээд Т.Сүхболдын 2022 оны байдлаар АТГ-т мэдүүлсэн хөрөнгө орлогын мэдүүлэгтэй танилцана уу.

ХАСХОМ-ын мэдээллээр Т.Сүхболд нь сүүлийн таван жилд ЭЦА-нд хэлтсийн даргаар ажилласан бөгөөд хөрөнгө орлого нь сүүлийн нэг жилд 29.13 хувиар өссөн байна. Мөн түүний өөрийн орлого 2019 онд 220.9 сая төгрөг болж 8.1 дахин өссөн ч 2020 онд 31.8 сая болж 7 дахин буурсан нь анхаарал татаж байна.

Тэрээр 2022 онд 48.3 сая төгрөгийн өөрийн орлоготой, 15 сая төгрөгийн гэр бүлийн орлоготой, нийт 203.6 сая төгрөгийн үнэ бүхий нэг орон сууц, нэг автомашины зогсоолтой, 30 сая төгрөгийн үнэ бүхий "Toyota prius Alpha XW-1" загварын автомашинтай, нийт 224 сая төгрөгийн үнэ бүхий хурдан удмын 61 адуу, 10 үхэр, 20 хоньтой, 20 сая төгрөгийн үнэ бүхий тус бүр эзэмших эрхтэй 500м2, 699м2 хоёр газар, 69 сая төгрөгийн үнэт эдлэл, урлаг, түүхийн үнэт зүйлтэй, дотоодын банк, санхүүгийн байгууллагад 27.2 сая төгрөгийн хадгаламжтай, бусдаас авах авлага байхгүй, шинээр 77.3 сая төгрөгийн зээл авсан, 4 сая төгрөг өв залгамжилж авсан, ямар нэгэн компанид хувьцаа эзэмшдэггүй гэж мэдүүлжээ.