Дарь-Эх, Монел, Шинэ монел, Цагаан давааны орчимд өнгөрсөн амралтын өдрүүдэд буусан үерийн гамшгийн дараах нөхцөл байдлыг сурвалжлахаар Баянзүрх дүүргийн 21-р хороог зорилоо. Монелын уулзвараас зүүн тийш салдаг засмал замыг хаажээ. Үерийн усаар урсаж орж ирсэн лаг шавар, хог хаягдлыг цэрэг, цагдаа, техникийн хүчээр цэвэрлэх ажил энд ид өрнөж байна.

Хөдөө явж байгаад сүлжээ орж иртэл хөрш нь залгаж хашаа, гэр нь үерт урссан гэдгийг дуулаад яаравчлан ирсэн гэх иргэнтэй таарав. Тэрээр Нийслэлээс хохирсон иргэдэд нөхөн төлбөр олгоно гэсний дагуу Нийслэлийн Шуурхай штаб байрлаж буй Баянзүрх дүүргийн 127-р сургууль руу явж буй нь энэ аж. Монелын уулзвараас 127-р сургууль хүртэлх 300 гаруй метр зайд байх бараг бүх айл үерт өртөж, эд хөрөнгөөрөө хохирч, сүйджээ. Хүрз барих чадалтай хүн бүр хог, шаврыг түрж зайлуулах ажилд нэгджээ. Аль нэг гудамжны мухарт үерийн усаар хальсан модон жорлонгийн бохир тогтож, эргэн тойрон бүгзгэр элс шороо дэгдэж, нэхүүн үнэр үнэртэх бөгөөд байгалийн хямрал нүүрлэсэн гамшгийн бүсэд хүүхдүүд бужигнаж, дугуй жийсэн жаалууд шавар ачсан том машинуудтай зэрэгцэн тоглоно.

Ийм дүр зураг дундуур алхсаар 127-р сургууль дээр ирлээ. Нийслэлийн Шуурхай штаб дээр төрийн алба хаагчид иргэдийн хохирлыг баталгаажуулж, нөхөн олговор олгох бүртгэлийг хийсэн байдалтай хөл хөдөлгөөн ихтэй байв. Дугаарлан зогсох иргэдийн сэтгэгдлийг сонсоход, хэдий байгалийн давагдашгүй хүчин зүйл тохиосон ч урьдчилан сэргийлэх боломж байсан. Гэвч Дарь-Эхийн айлуудын шаардлагыг хэн ч тоож сонсдоггүй. Хохирлыг татвар төлөгчдийн мөнгөөр бус үерийн даланг таглаж хог асгасан хүмүүсээр нь төлүүлж, хариуцлага тооцох ёстой зэргээр байр суурийг илэрхийлж, бухимдаж байв.