Үндэсний соёл амралтын хүрээлэн буюу Парк үерийн усанд автаж, хаалгаа бариад нэлээд хугацаа өнгөрчээ. Өнгөрсөн амралтын өдөр нээхээр бэлтгэл базааж байсан ч дахин үер автсан. Паркийн нөхцөл байдал, хохирлын талаар "Үндэсний соёл амралтын хүрээлэн" ХХК-ийн Бизнес хөгжлийн газрын захирал М.Нүрмаагаас тодрууллаа.
-Парк үер уснаас болоод хэчнээн хэмжээний хохирол амсаад байна вэ?
-Монголын худалдаа аж үйлдвэрийн танхимын шинжээчдийн баг газар дээр нь ирж ажиллаад паркт одоогоор 2.2 тэрбум төгрөгийн хохирол учирсан гэдгийг баталгаажуулаад байгаа. Гэхдээ хүмүүсийн сайн мэдэх хадан чанга яригч буюу speaker-үүд болон зарим кабелийн утсыг ажиллах үгүйг нь мэдэх боломжгүй байна. Үүнийг бүрэн цэвэрлэж, хатааж байж дуугаргаж үзнэ. Дээр нь түрээслэгчдийн хохирол, олон хоног сул зогссоны алдагдлыг огт оруулаагүй байгаа.
-Том хэмжээний ямар, ямар хохирол учирсан бэ?
-Томоохон хохирол гэх юм бол манай боулингийн төв тааз хүртлээ үерийн усанд автсан. Харамсалтай нь, бид энэ жил боулингийн төвийн найман замыг иж бүрнээр нь авч, гаднаас инженерүүд ирж суурилуулсан. Боулингийн төв 600 орчим мкв талбайтай. Уг нь засвар интерьерийн ажил хийгээд нээхэд бэлэн болоод байсан ч усанд автаад ашиглах боломжгүй болсон. Түүнчлэн, манай агуулахууд усаар дүүрсэн. Тиймээс хангамжийн материал, сэлбэг хэрэгслүүд ашиглах боломжгүй болсон байгаа. Талбайн дууны систем A,B, C гэсэн гурван хэсэгт хуваагдаж дуугардаг удирдлагатай байдаг юм. C хэсгийн удирдлагын өрөө, тэнд байдаг техник тоног төхөөрөмж усанд автчихсан. Ингээд тоочвол маш урт жагсаалт болно.
-Ер нь парк даатгалтай байдаг уу. Даатгалаас төлүүлэх боломж бий юу?
-Манай байгууллага хэсэгчилсэн даатгалтай. Огт даатгалгүй хэсгүүдээ хохирлын үнэлгээнд оруулсан байгаа. Даатгал одоогоор төлж барагдуулах эсэхийг хэлж мэдэхгүй байна.
- Уг нь ойрын хугацаанд нээхээр төлөвлөж байсан. Уржигдрын борооны улмаас дахиад хойшилсон уу?
-Бид долдугаар сарын 26-ны өдрийн лхагва гараг нээхээр төлөвлөж байгаа. Зөвхөн зуны улиралд үйл ажиллагаа явуулдаг, улирлын чанартай байгууллага бүтэн сар ажиллахгүй байна гэдэг их хүнд тусаж байна. Гэхдээ хүүхэд, залуус ирж тоглодог, баярладаг газар шүү дээ. Тэгэхээр ариутгал, халдваргүйжүүлэлт, аюулгүй байдал чухал учраас тоног төхөөрөмжийг нэг бүрчлэн шалгаж байж нээхээр шийдвэрлэсэн байгаа.
-Энэ зун бороо их байх төлөвтэй байна. Дахин хохирол амсахгүйн тулд ямар арга хэмжээ ажлыг хийж байна вэ?
-Ер нь, паркт ингэж ус орж ирж байгаагүй. Сүүлийн 30 жил ажилласан инженер манайд бий. Тэгэхэд ингэж ус орсон гээгүй. Олимпын гүүрний ажилтай холбоотойгоор манай зүүн жигүүр их нам доор болсон. Үүний усны хаялгыг яаж хийсэн гэдгийг нь мэдэхгүй байна. Хийсэн хүмүүс нь мэдэх байх. Мөн Шангриллагаас Нарны зам чиглэлтэй замыг цаад талд байгаа барилга орон сууцыг эрсдэлээс сэргийлэх зорилгоор сэтэлсэн. Үүнээс болж манай талбай руу ус орсон. Бид мэргэжлийн байгууллага урьж ажиллуулаад зүүн хэсгээ усанд автуулахгүй байх тал дээр шийдэл, төсөв ярьж байна. Харин зориудаар зам сэтэлж үерийн усыг урсгаж байгаа арга хэмжээ авах эсэхийг мэдэхгүй байна. Тэр тохиолдолд бид хамгаалж чадахгүй шүү дээ.
Мөн үерийн дараах цэвэрлэгээ, үйлчилгээ, ариутгал, лагийг цэвэрлэх ажлыг парк 100 хувь өөрийн зардал, хөрөнгөөр хийж байгаа.
-Паркийн зарим тоглоом эвдрэлтэй байна гэх мэдээлэл цахим сүлжээгээр яваад байдаг шүү дээ. Жишээлбэл, алсыг харагчийн гагнаас салсан гэдэг ч юм уу. Ер нь паркийн тоглоомны насжилт нь ямархуу байна вэ?
-Паркийн хуучин тоглоомуудыг тухайн үедээ Дархан, Эрдэнэт, Өвөрхангай гээд орон нутаг руу хуваарилж өгсөн юм билээ. Ашиглаж боломжтойг нь тогтоогоод орон нутаг руу явуулж, ашиглах боломжгүйг нь акталсан байдаг. Паркийн хамгийн анхны тоглоомыг 2009 онд суурилуулсан. Түүнээс хойш нэмэгдсээр байгаад өнгөрсөн жил гэхэд л дөрвөн тоглоом шинээр суурилуулсан. Энэ жил завь, мөргөлддөг машин зэрэг хоёр тоглоомыг шинэчилсэн. Одоогийн байгаа тоглоомны хамгийн өндөр насжилттай нь 2009 оных гэж ойлгож болно.
