УИХ-ын гишүүн Х.Ганхуягаас Эрчим хүчний сайдад хандаж Эрчим хүчний хангамжийн найдвартай байдлын талаар тавьсан асуулгын хариуг сонслоо. Танилцуулгыг Эрчим хүчний сайд Б.Чойжилсүрэн хийж, гишүүд асуулт асууж, хариулт авсан юм.

УИХ-ын гишүүн Б.Пүрэвдорж: Монгол Улс ураны нөөцөөрөө дэлхийн хоёр хувийг эзэмшдэг. Тэгэхээр ураны ордуудаа ашиглаад, эдийн засгийн эргэлтэд оруулмаар байна. НҮБ-ын байнгын таван орны эрх ашгийг хангаад өгчих хэрэгтэй. Тэгж байж бид атомын цахилгаан станцыг ашиглах юм руу явна. Атомын цахилгаан станц барина гэхээр цөмийн хаягдлын тухай ярьдаг. Тийм зүйл байхгүй. Хоёр хөрш чинь нутаг дэвсгэр дээгүүрээ цөмийн хаягдал тээвэрлүүлээд явахгүй шүү дээ. Энэ бол Монголыг эрчим хүчний хараат бус байх бодлогын эсрэг явуулж байгаа гадаадынхны бодлого. Нэг кг уранаар гаргаж байгаа эрчим хүч сая нүүрсээр гаргаж байгаа эрчим хүчтэй тэнцүү. Гэтэл бид өөрсдөө ордтой байж ийм сайхан боломжийг ашиглаж чадахгүй байгаа нь харамсалтай байна. Нэг ам.доллар зарцуулаад 3 ам.доллар олох төсөл рүү өнөөдрийг хүртэл бид орохгүй байгаа нь буруу.

Улаанбадрахын ордыг ашиглалтад оруулаад түүнийхээ бүтээгдэхүүн хуваах гэрээгээр ядаж л 300 мегабайтын атомын цахилгаан станцтай болох хэрэгтэй. Тэр чинь нэг портер дээр л багтана. Ийм их хөгжчихсөн юм. Улаанбаатараас нэлээд хол бариад л Улаанбаатарыг тэр чигт нь эрчим хүчээр хангаад хорт утаан дотор амьдарч байгаа иргэдээ аврах бүрэн боломжтой. Үүн дээр Засгийн газар ажиллах хэрэгтэй.

Эрчим хүчний сайд Б.Чойжилсүрэн: Атомын цахилгаан станц Монгол Улсын хувьд шинэ сэдэв. Нэлээд нухацтай судлах хэрэгтэй. Би эрчим хүчний судалгааны хүрээлэнг судлаад танилцуул гэсэн байгаа. Францын Ерөнхийлөгч Монгол Улсад айлчилна гэж байгаа. Энэ талаар Засгийн газар тухайн үед нь ярина. Одоо үр дүн гараагүй байхад ярьж болохгүй байна.

УИХ-ын гишүүн Б.Пүрэвдорж: 20 гаруй жилийн өмнө Орано компани Казахстан руу орсон. Одоо Казахстан ураны номер тав тоглогч болчихсон явж байна. Гэтэл Монгол хоцорсон хэвээрээ, юу ч байхгүй. Тэгэхээр арваннэгдүгээр сардаа багтаагаад Ораногийн хөрөнгө оруулалтын гэрээг яаралтай батлаад, ордыг ашиглуулах ёстой. Үүн дээр Засгийн газар зориг гаргаад ажиллана гэж итгэж байгаа.

УИХ-ын дарга Г.Занданшатар: Шинэ хот байгуулна гээд байгаа. Тэнд Өвөрхангайн нүүрсний уурхайгаас дулааны цахилгаан барихаас нөөц байхгүй. Тэгэхээр атомын цахилгаан станцаараа эрчим хүч, дулаантай болгож болно. Тэр жижиг хот бол нэг кантенер хүрэхгүй нөөцөөр гэрэлтэнэ. Шинэ хот байгуулалт дээр тийм боломж судалж байгаа гэж би ойлгосон.